जामखेडमधील मृत व्यक्तीच्या दोन्ही मुलांनाही कोरोना

अहमदनगर ( प्रतिनिधी ) –जिल्हा रुग्णालयाने पुण्याच्या लष्करी वैद्यकीय महाविद्यालयाकडे रविवारी पाठविलेल्या अहवालांपैकी दोन व्यक्तींचे अहवाल सोमवारी सकाळी पॉझिटिव्ह आले आहेत. हे दोघे बाधीत काही दिवसांपूर्वी मृत्यू पावलेल्या जामखेडच्या रुग्णाची मुले आहेत, अशी माहिती जिल्हा शल्यचिकित्सक डॉ.प्रदीप मुरंबीकर यांनी दिली. यामुळे कोरोना बाधीत रुग्णाची संख्या आता 31 झाली आहे. यासह श्रीरामपूर तालुक्यातील एका बाधीत व्यक्तीचा पुण्यात ससून हॉस्पिटलमध्ये उपचार सुरू असताना मृत्यू झालेला आहे. यामुळे जिल्ह्यातील कोरोनाबाधीतांचा आकडा 32 पर्यंत पोहचला आहे.

दरम्यान, रविवारीपर्यंत जिल्ह्यात 12 रुग्णांनी कोरोनावर मात करत कोरोनामुक्त झालेल होते. यात आणखी पाच रुग्णांचा 14 दिवसानंतरचा अहवाल निगेटिव्ह आल्याने डिस्चार्ज देण्यात आला. तसेच नगरच्या एका 76 वर्षीय व्यक्तीचाही अहवाल निगेटिव्ह आल्याने या सर्वांना संस्थात्मक आणि रुग्णालय देखरेखीखाली ठेवण्यात येणार आहे. त्यामुळे जिल्ह्यातील कोरोनामुक्त झालेल्यांची संख्या आता 18 झाली आहे. सोमवारी रात्रीपर्यंत नगरच्या बूथ हॉस्पिटलमध्ये 11 रुग्णांवर उपचार सुरू आहेत.

जामखेड येथील एका व्यक्तीचा काही दिवसांपूर्वी जिल्हा सरकारी रुग्णालयात मृत्यू झाला होता. मात्र, त्याचा अहवाल आला नसल्याने त्याचा मृतदेह कुटुंबियांच्या ताब्यात देण्यात आला नव्हता. त्या रुग्णाचा अहवाल पॉझिटिव्ह आल्यानंतर त्यांच्या कुटुंबियातील सर्वांचे घशातील स्त्राव तपासणीसाठी पाठविण्यात होते. त्यात त्याचे 35 आणि 29 वर्षीय मुले बाधीत असल्याचे आढळून आले. त्यामुळे कोरोना बाधीत रुग्णाची संख्या आता 31 झाली आहे.

याशिवाय मूळच्या श्रीरामपूर तालुक्यातील एका बाधीत व्यक्तीचा ससून हॉस्पिटलमध्ये उपचार सुरू असताना मृत्यू झाला होता. दरम्यान, 12 रुग्णांना यापूर्वीच डिस्चार्ज देण्यात आला आहे. तसेच, मुकुंदनगर येथील 76 वर्षीय बाधीत रुग्णांचा दुसरा अहवाल निगेटिव्ह आला असून आणखी पाच व्यक्तींचे अहवाल निगेटिव्ह आले आहेत अशा सहा व्यक्तींनी कोरोनावर मात केल्याने जिल्ह्यातील 18 रुग्ण कोरोनामुक्त झाले आहेत. या सर्वांना जिल्हा रुग्णालय आणि बुथ हॉस्पिटलमधून डिस्चार्ज देऊन संस्थात्मक रुग्णालयात देखरेखीखाली ठेवण्यात येणार असल्याचे आरोग्य विभागाच्यावतीने सांगण्यात आले.