अहमदनगर |प्रतिनिधी| Ahmednagar
तिघांनी तरुणाला चाकूचा धाक दाखवून मारहाण करीत त्याच्या खिशातील रोख रक्कम व दुचाकी बळजबरीने घेऊन गेले आहेत. अशोक सावळा खाडे (वय 32 रा. खाडे वस्ती, पाटोदा, ता. जामखेड) असे मारहाण झालेल्या तरुणाचे नाव आहे. नगर-पुणे रोडवर चास शिवारात रिलायन्स पेट्रोलपंपाजवळ मंगळवारी रात्री 10 वाजता ही घटना घडली आहे.
खाडे यांनी बुधवारी सकाळी नगर तालुका पोलीस ठाण्यात दिलेल्या फिर्यादीवरून तीन चोरट्यांविरूध्द जबरी चोरीचा गुन्हा दाखल करण्यात आला आहे. मंगळवारी रात्री अशोक खाडे त्यांच्या दुचाकीवरून (एमएच 16 सीझेड 8260) नगर-पुणे रोडने शिरूर (जि. पुणे) येथे जात असताना त्यांना तिघांनी चास शिवारात रिलायन्स पेट्रोलपंपाजवळ अडवले.
चाकूचा धाक दाखवून डोक्यात मारहाण केली. खिशातील चारशे रुपये व दुचाकी बळजबरीने काढून घेत पोबारा केला. खाडे यांनी नगर तालुका पोलिसांना घटनेची माहिती देत फिर्याद दिली आहे. याप्रकरणी अधिक तपास पोलीस उपनिरीक्षक रणजित मारग करीत आहेत.
