नेवासा |तालुका प्रतिनिधी| Newasa
मुख्यमंत्री सहाय्यता निधी प्रतिटन उसाला 5 रुपयांवरून 2 रुपये करण्यात यावा, साखर संकुल देखभाल निधी 50 पैसे वरून प्रति टन 25 पैसे तर स्व.गोपीनाथ मुंढे ऊस तोड कामगार कल्याण महामंडळ निधी 10 वरून प्रतिटन 2 रुपये करण्यात यावा त्याच बरोबर गाळप हंगाम 2022-23 पासून उत्पादन खर्चावर आधारीत निश्चित करुन साखरेचा किमान विक्री दर 3600 रुपये प्रति क्विंटल करणेबाबत केंद्र सरकारकडे शिफारस करावी अशी मागणी वेस्ट इंडियन शुगर मिल्स असोसिएशनने (विस्मा) केली आहे.
मुख्यमंत्री यांचे अध्यक्षतेखाली हंगाम 2021-22 चा आढावा व गळीत हंगाम 2022-23 चे धोरण ठरविण्यासाठी मंत्री समितीच्या बैठकीच्या अनुषंगाने वेस्ट इंडियन शुगर मिल्स असोसिएशनने काही मुद्दे साखर आयुक्तांना सुचवले आहेत.
मागील दोन वर्षांमध्ये कोविड महामारीमुळे मुख्यमंत्री सहाय्यता व साखर संकुल निधीमध्ये वाढ करण्यात आली होती. परंतु आता परिस्थिती पुर्ववत झाल्यामुळे व ऊस गाळप मोठ्या प्रमाणात वाढल्यामुळे शासकीय कपाती कमी करण्यात याव्यात. त्यात मुख्यमंत्री सहाय्यता निधी प्रति टन 5 ऐवजी 2 रुपये, साखर संकुल देखभाल निधी 50 ऐवजी 25 पैसे प्रति टन करण्यात यावा, स्व. गोपीनाथ मुंडे ऊस तोड कामगार कल्याण महामंडळासाठी प्रति टन 10 रुपयांऐवजी 2 रुपये प्रति टन कपात करावी, असे म्हटले आहे.
