नाशिक ।प्रतिनिधी
दहावी, बारावीच्या विद्यार्थ्यांच्या पालकांकडून संमतीपत्र घेऊन कमी संख्येने, मास्क, सॅनिटायझर, थर्मामीटर आदींचा वापर करून व सोशल डिस्टंन्सिग पाळत 15 ते 20 विद्यार्थ्यांना घेऊन शिकवणी घेण्याची परवानगी मिळावी, अशी मागणी खासगी कोचिंग क्लासेस संघटनेने केली आहे.
कोचिंग क्लासेस संचालक संघटनेच्या पदाधिकार्‍यांनी अप्पर जिल्हाधिकारी दत्तप्रसाद नडे यांना निवेदन देत ही मागणी केली. करोना संसर्ग वाढत असून जिल्हा प्रशासनाने पुन्हा एकदा कठोर निर्बंध लादले आहे. जीवनावश्यक वस्तू व सेवा वगळता इतर सर्व दुकाने सकाळी सात ते सायंकाळी सात या वेळेत दुकाने सुरु राहतील व शनिवार आणि रविवार बाजारपेठा बंद राहतील असे आदेश दिले आहेत.
या निर्णयाचा फटका अनेक क्षेत्रांना बसला असून कोचिंग क्लासेस चालकांना सहन करावा लागत आहे. एक- दीड महिन्यांपूर्वी जिल्हाधिकार्‍यांनी क्लासेस सुरु करण्यास परवानगी दिली होती. पुन्हा एकदा शाळा व महाविद्यालय बंदमुळे कोचिंग क्लासेस चालकांवर उपासमारीची वेळ येऊन ठेपली आहे.
जिल्हाधिकार्‍यांनी करोनाचा प्रादुर्भाव रोखण्यासाठी काढलेल्या निर्बंधाच्या आदेशाला अनुसरुन शाळा व महाविद्यालयांप्रमाणेच पहिली ते नववी व अकरावीचे क्लासेस बंदच राहतील .परंतु विद्यार्थ्यांचे शैक्षणिक नुकसान होऊ नये म्हणून व क्लासेसचालकांचा उदरनिर्वाह चालू राहावा म्हणून आदेशात म्हटल्याप्रमाणे, दहावी बारावीचे वर्ग व स्पर्धा परीक्षा वर्ग, जसे पालकांच्या संमतीने शाळा महाविद्यालयात सुरू राहतील तसेच सर्व नियम पाळून त्यावर्गांचे क्लासेस कमी विद्यार्थी संख्येने सुरु राहू द्यावे अशी मागणी निवेदनाद्वारे करण्यात आली आहे.
