मोदलपाडा/ सोमावल / वार्ताहर- nandurbar
तळोदा (Taloda) शहरातील व्यापारी संकुलातील २०० च्यावर व्यापारी गाळ्यांना नगरपालिकेकडून अनेक वर्षांपासून घरपट्टी व पाणीपट्टी लावण्यात आलेली नाही. त्यामुळे पालिकेचे लाखों रुपयाचे उत्पन्न बुडत आहे. या व्यापारी गाळ्यांना घरपट्टी व पाणीपट्टी न लावण्यामागील पालिका सत्ताधार्‍यांचे गौडबंगाल काय आहे असा घणाघाती आरोप शिवसेनेचे शहर प्रमुख जितेंद्र दुबे यांनी पत्रकार परिषदेत केला. यावेळी पालिकेच्या विविध कामांचा बाबतीत त्यांनी पोलखोल केली.
तळोदा येथे पत्रकार परिषद सकाळी १० वा . बोलावण्यात आली होती. यावेळी श्री दुबे पुढे म्हणाले की, तळोदा शहरात मोठमोठे शॉपिंग कॉम्प्लेक्स (Shopping complex) उभे आहेत .यातील दुकानदारांनी पालिकेकडे घरपट्टी व पाणीपट्टी पालिकेने सुरू करावी यासाठी अर्ज देवूनही पालिकेकडून या दुकानदारांना घरपट्टी व पाणीपट्टी का लावण्यात येत नाही ?
असा सवाल त्यांनी उपस्थित केला . शहरात हद्दवाढीतील नवीन वसाहतीतील कच्चा पक्क्या घराला अव्वाचा सव्वा घरपट्ट्या पालिकेकडून लावण्यात आली आहे . तर शहरात २० वर्षांपासून उभे असलेल्या शॉपिंग कॉम्प्लेक्स मधील दुकानांवर इतके वर्ष घरपट्टी व पाणीपट्टी न लावण्याची मेहरबानी का ?
पालिकेचे पाथदिव्यावरील इलेक्ट्रिक बील कमी व्हावे यासाठी २०१७- १८ या वर्षात इलेक्ट्रिक पोल वर लाखों रुपये खर्च करुन सेन्सर डिव्हाईस मशीन बसविण्यात आले होते . त्यावेळी हे डिव्हाईस बसविल्यानंतर पालिकेचा इलेक्ट्रिक खर्च अर्ध्यावर येईल असे सांगण्यात आले होते . परंतु आज पालिकेचा इलेक्ट्रिक खर्चात शून्य टक्के बिलात फरक पडला नाही .या डिव्हाईस बसविण्यावरील खर्च २० ते २२ लाख वाया गेलेत .
तळोदा शहरात आमदार,खासदार निधीतून हायमस्ट एलईडी लाईट (Highest LED light) दिलीत . प्रत्येक पोलवर ४ मोठी एलईडी लाईट लावण्यात आली होती . परंतु सद्या स्थितीत शहरातील ह्या पोलवर कुठे एक तर कुठे दोन असे एलईडी लाईट आहेत . मग एलईडी लाईट गायब झालीत कशी ? ठेकेदार किंवा पालिकेने हे एलईडी लाईट काढली नाहीत तर ही लाईट चोरीला गेलीत तर याबाबतीत पालिकेच्या अधिकार्‍यांनी पोलिसात फिर्याद का दिली नाही ?
पालिकेकडून दरवर्षी शहरात विविध ठिकाणी वृक्षारोपण करण्यात येते यावर लाखों रुपये खर्चही करण्यात येतो . परंतू या वृक्षाचा संवर्धन पालिकेकडून होतांना दिसत नाही . मागील ३ -४ वर्षात लावण्यात आलेली वृक्षांपैकी ३० टक्केही वृक्ष जिवंत नाहीत . २०१८ मध्ये पालिकेने सात फुट उंचीची वृक्ष लावली होती . त्या वृक्षांची स्थिती सर्वश्रुत आहे . याला जबाबदार असणार्‍या अधिकारी व कर्मचारी यावर कार्यवाही का करण्यात येत नाही ? यात मोठ्या प्रमाणात भ्रष्टाचार झालेला आहे .
पालिकेकडून वृक्षांची लागवड करण्यात येते . या वृक्षांचा सुरक्षिततेसाठी टीगार्ड लावून देखावा करण्यात येतो .परंतू पालिकेकडून प्रत्यक्षात टीगार्ड खरेदी करण्यात येत नाहीत . या बाबत आमच्या मनातील शंका दूर करावी .असे सांगत पालिकेच्या एकूणच कारभारावर श्री दुबे यांनी आरोपांची सरबत्ती पत्रकार परिषदेत केली . यावेळी पत्रकार परिषदेला आनंद सोनार, संजय पटेल, जगदीश परदेशी, सूरज माळी, कल्पेश माळी, जयेश सुर्यवंशी, श्रावण तिजविज, विनोद वंजारी, आदी उपस्थित होते.
