नंदुरबार | प्रतिनिधी Nandurbar
जिल्ह्यात १४ एप्रिल रोजी रात्री ८ वाजेपासून १ मे २०२१ रोजी सकाळी ७ वाजेपर्यंत कलम १४४ लागू करण्यात आले आहे. शनिवार आणि रविवारी पूर्णत: संचारबंदी रहाणार असून या कालावधित वैद्यकीय सुविधा, औषध दुकाने, पाणी, विद्युत, दूध, गॅस वितरक, वृत्तपत्र सेवेला मुभा देण्याचे निर्देश जिल्हाधिकारी डॉ.राजेंद्र भारुड यांनी दिले आहे.
मुख्यमंत्री उद्धव ठाकरे यांच्यासमवेत झालेल्या बैठकीनंतर हे निर्देश देण्यात आले आहेत.कोणत्याही नागरिकास योग्य कारणाशिवाय सार्वजनिक ठिकाणी फिरण्यास प्रतिबंध असेल. आदेशात सूट देण्यात आलेल्या आस्थापनांशिवाय इतर आस्थापना बंद रहातील.
शनिवार व रविवार वगळता इतर दिवशी किराणा, भाजीपाला, फळविक्रेते, डेअरी, बेकरी, मिठाई, खाद्यान्न दुकाने सकाळी ७ ते दुपारी १ वाजेपर्यंत सुरू ठेवण्यास मुभा असेल.
अपवादात्मक सेवांना सकाळी ७ ते रात्री ८ दरम्यान सूट देण्यात आली असून त्यासंबंधी हालचाली व सेवा सुरू ठेवण्यास नमूद कालावधीत प्रतिबंध असणार नाही. यासेवांमध्ये कार्यरत चालक, घरेलू कामगार यांना कामाच्या ठिकाणी जाण्यासाठी स्थानिक प्रशासनाची परवानगी घेणे आवश्यक राहील.
