शिर्डी |प्रतिनिधी| Shirdi
श्री साईबाबा संस्थान विश्वस्त व्यवस्था, शिर्डीच्यावतीने 24 ऑक्टोबरपासून सुरू असलेल्या श्रींच्या पुण्यतिथी उत्सवाची
सांगता काल्याच्या कीर्तनानंतर संस्थानचे मुख्य कार्यकारी अधिकारी कान्हूराज बगाटे यांच्या हस्ते दहीहंडी फोडून झाली.
काल उत्सवाच्या सांगता दिनी पहाटे 4.30 वाजता काकड आरती, त्यानंतर पहाटे 5.20 वाजता श्रींचे मंगल स्नान व शिर्डी माझे पंढरपूर ही आरती झाली. सकाळी 6.30 वाजता संस्थानचे मुख्य कार्यकारी अधिकारी कान्हूराज बगाटे व त्यांच्या सुविद्य पत्नी संगीता बगाटे यांच्या हस्ते गुरुस्थान मंदिरात रुद्राभिषेक पूजा करण्यात आली तर उपमुख्य कार्यकारी अधिकारी रवींद्र ठाकरे व त्यांची सुविद्य पत्नी वैशाली ठाकरे यांच्याहस्ते समाधी मंदिरात श्रींची पाद्यपूजा करण्यात आली.
सकाळी 10.00 वाजता मंदिर कर्मचारी संभाजी तुरकणे यांच्या गोपाळकाला कीर्तनानंतर दहीहंडी फोडण्यात आली. त्यानंतर दुपारी 12.10 वाजता श्रीं ची माध्यान्ह आरती झाली. सायंकाळी 6.00 वाजता श्रींची धुपारती तर रात्री10.30 वाजता शेजारती झाली.
श्रींच्या पुण्यतिथी उत्सवाच्या मुख्य दिवशी रुढी परंपरेनुसार आयोजित करण्यात आलेल्या प्रतिकात्मक भिक्षा झोळीत साईभक्तांनी भरभरून दान दिले. यामध्ये गहू, तांदूळ, बाजरी, ज्वारी, तूरदाळ, मूगदाळ, मसूरदाळ, हरभरा, हरभरादाळ, रवा, शेंगदाणा, गूळ, साखर, शुध्द देशी तूप व खाद्य तेल आदींव्दारे 2 लाख 85 हजार 272 रुपये व रोख रक्कम 70 हजार 308 रुपये अशी एकूण 3 लाख 55 हजार 580 रुपये इतकी देणगी भिक्षा झोळीव्दारे प्राप्त झाली.
तसेच श्री पुण्यतिथी उत्सवाच्या औचित्यावर हैद्राबाद येथील साईभक्त सुनील शहा यांनी 1515 ग्रॅम वजनाची सुमारे 91 हजार रुपये किंमतीची चांदीची परडी संस्थानला देणगी स्वरुपात दिली.
हा उत्सव यशस्वीरित्या पार पाडण्यासाठी संस्थानचे मुख्य कार्यकारी अधिकारी कान्हूराज बगाटे यांच्या मार्गदर्शनाखाली उप मुख्य कार्यकारी अधिकारी रवींद्र ठाकरे, मुख्य लेखाधिकारी बाबासाहेब घोरपडे, सर्व प्रशासकीय अधिकारी, सर्व विभाग प्रमुख व कर्मचारी यांनी विशेष परिश्रम घेतले.
