नाशिक । प्रतिनिधी
करोनाच्या तिसर्‍या लाटेच्या पार्श्वभूमीवर जिल्हा प्रशासनाच्या आवाहनाला प्रतिसाद देत कान, नाक व घसा तज्ज्ञ असलेले सहा डॉक्टरांनी जिल्हा रुग्णालयात सेवा देणे सुरू केले आहे. तसेच शहरातील सर्वच बालरोग तज्ञांनी जिल्हा प्रशासनाला अहवाल सादर करत सर्वोतोपरी मदतीचे आश्वासन दिले.
म्युकरमायकोसिस या पोस्ट कोव्हिड आजाराच्या पार्श्वभूमीवर जिल्हा प्रशासनाने शहरातील कान-नाक-घसा तज्ज्ञांना मदतीचे आवाहन केले. त्यास प्रतिसाद देत शहरातील 6 डॉक्टरांनी लागलीच प्रशासनाची मदत करण्याचा निर्णय घेतला.
जिल्ह्यातील म्युकरमायकोसिस रुग्णांच्या संख्येत होणारी वाढ लक्षात घेता, जिल्हा सामान्य रुग्णालय येथे मनुष्यबळ व आधुनिक साधन सामुग्री उपलब्ध होईपर्यंत रुग्णांच्या शस्त्रक्रिया करण्यासाठी जिल्हाधिकारी सूरज मांढरे यांनी सामाजिक बांधिलकी म्हणून खासगी कान, नाक व घसा तज्ञ डॉक्टर्स यांना सेवा देण्याचे आवाहन केले होते. त्यास प्रतिसाद देत म्युकरमायकोसिस रुग्णांच्या शस्त्रक्रिया करण्यासाठी सहा डॉक्टर्सने सहमती दर्शवली आहे.
