लॉकडाउन आधी लोकांच्या बँक खात्यात पैसे जमा करा

कराड –

महाराष्ट्रात करोना रुग्णसंख्या झपाट्याने वाढत असल्याने मुख्यमंत्री उद्धव ठाकरे यांनी राज्यात लॉकडाउन लागू

करण्याचे संकेत दिले आहेत. दरम्यान, राज्यात लॉकडाउनची अंमलबजावणी करण्याआधी राज्य सरकारने सर्वसामान्य जनतेच्या बँक खात्यात पैसे जमा करावेत अशी मागणी माजी मुख्यमंत्री पृथ्वीराज चव्हाण यांनी सरकारकडे केली आहे.

विदर्भातील अमरावती आणि नागपूरपासून सुरू झालेली करोनाची ही दुसरी लाट मुंबई-पुण्यासह, मराठवाडा आणि राज्याच्या इतर भागात वेगाने पसरत आहे. या पार्श्वभूमीवर पुन्हा लॉकडाउन करावे की कसे यावर प्रशासन, वैद्यकीय तज्ञ,उद्योग क्षेत्रातील व्यक्ती आणि सामान्य जनता यांमधून वेगवेगळे मतप्रवाह पुढे येत आहेत. महाराष्ट्रात उद्योजक असो किंवा वैद्यकीय तज्ञ प्रत्येकजण निडरपणे आपले मत मांडू शकतो ही आश्वासक बाब असली तरीदेखील शासनासमोर मात्र गंभीर पेचप्रसंग आहे.परिणामी राज्य पातळीवर लॉकडाऊनची अपरिहार्यता निर्माण झाल्यास खालील बाबी विचारात घेणे आवश्यक असल्याचे चव्हाण यांनी सांगितले. केंद्र सरकारने गेल्या वर्षी मार्च मध्ये अचानकपणे कोणतेही नियोजन न करता लॉकडाउन घोषित केले होते. सारासार विचार न करता घेतलेल्या या निर्णयाचा मोठा फटका देशाच्या अर्थव्यवस्थेला बसला व भारतातील 3 कोटींहून अधिक लोक दारिद्र्य रेषेखाली ढकलले गेले. त्यामुळे जनतेला विश्वासात घेऊन अर्थव्यवस्थेचे कमीत-कमी नुकसान होईल आणि कोरोना संसर्गाची साखळी मोडण्यास मदत ठरेल अशा प्रकारे लॉकडाउनचे नियोजन करणे आवश्यक असल्याचेही चव्हाण यांनी सांगितले आहे.

माजी मुख्यमंत्री पृथ्वीराज चव्हाण यांनी केलेल्या सहा मागण्या

लॉकडाउनची अंमलबजावणी करण्याआधी सर्वसामान्य जनतेला पूर्वसूचना द्या

लॉकडाउनचा कालावधी कमीत-कमी ठेवा

लॉकडाउन दरम्यान बुडणार्‍या रोजगाराची भरपाई पाश्चिमात्य देशांप्रमाणे सरकारने रोख रकमेद्वारे थेट लाभार्थ्यांच्या बँक खात्यात जमा करावी. यासाठी प्रसंगी आमदार व खासदार स्थानिक विकास निधीचा वापर करावा

खाजगी वाहनातून प्रवासास मुभा द्यावी

शेतमाल तसेच इतर औद्योगिक मालाची वाहतूक चालु ठेऊन पुरवठा साखळीवर परिणाम होऊ देवू नये

लसीकरणाचे प्रमाण मोठ्या संख्येने वाढवावे