ईदनिमित्त नगरमध्ये सामुदायिक नमाज

अहमदनगर |प्रतिनिधी|Ahmednagar

नगर शहरात मुस्लिम समाज बांधवांनी बकरी ईद रविवारी (दि.10) मोठ्या उत्साहात साजरी केली. शहरातील ईदगाह मैदानमध्ये सकाळी 9.30 वाजता ईदची सामुहिक नमाज मौलाना नदिम अख्तर यांच्या मार्गदर्शनाखाली पार पडली.

या बकरी ईदनिमित्त कुर्बानीसाठी लागणारे बोकडं खरेदी-विक्रीत जिल्ह्यात कोट्यावधीची उलाढाल झाली. सकाळी 7 वाजल्यापासून शहरातील विविध मशिदीमधून बकरी ईदची नमाज अदा करण्यात आली. ईदनिमित्त प्रमुख नमाज पठण कोठला येथील ईदगाह मैदानात झाली.

प्रारंभी धार्मिक व्याख्यान, ईदची नमाज, खुदबा व त्यानंतर मुस्लिम बांधवांनी देशात शांतता, समृध्दी व सामाजिक सलोख्यासाठी प्रार्थना केली. ही ईद तीन दिवसांपर्यंत साजरी करण्यात येते. रविवारी दिवसभर नगर शहरात पावसाची रिपरिप सुरु होती. यामुळे नमाजनंतर मुस्लिम समाज बांधवांना एकमेंकांना शुभेच्छा देण्यासाठी जाता आले नाही.