अहमदनगर |प्रतिनिधी| Ahmednagar
न्यायालयात खटला चालविण्यासाठी कमी फी दिल्यावरून वकिलाने पक्षकारास मारहाण केली. सावेडीतील तपोवन रस्त्यावर गुरूवारी रात्री ही घटना घडली. सचिन बाबासाहेब दहिफळे (वय 36 रा. हनुमान मंदिरासमोर, शिवाजीनगर, तपोवन रोड, सावेडी) असे मारहाण झालेल्या पक्षकाराचे नाव आहे.
याप्रकरणी दहिफळे यांनी तोफखाना पोलीस ठाण्यात दिलेल्या फिर्यादीवरून वकिल गोरक्षनाथ तांदळे, शेखर मुळे (रा. निर्मलनगर) व दोन अनोळखी यांच्याविरूध्द गुन्हा दाखल करण्यात आला आहे.
सचिन बाबासाहेब दहिफळे यांनी अ‍ॅड. गोरक्षनाथ तांदळे यांच्याकडे न्यायालयातील खटला सोपविला होता. अ‍ॅड. तांदळे यांनी हा खटला चालविण्यासाठी आणखी फी ची मागणी केली. फीच्या मागणीसाठी अ‍ॅड. तांदळे हे गुरूवारी रात्री दहिफळे यांच्या घरी आले. पैशाची मागणी केली, तांदळे आणि त्याच्या समवेत असलेल्या शेखर मुळे आणि दोन अनोळखी तरुणांनी घरात घुसून दहिफळे यांना लाथाबुक्क्यांनी मारहाण केली. घरातील कपाटाच्या काचा फोडून नुकसान केले. दहिफळे यांनी दिलेल्या फिर्यादीवरून तोफखाना पोलीस ठाण्यात चौघांविरूध्द गुन्हा दाखल करण्यात आला असून अधिक तपास पोलीस करीत आहेत.
