स्वाईन फ्लूचे थैमान, आणखी तिघांचा बळी

0

नेवाशात शेतकर्‍याचा तर समशेरपूर, जामखेडमध्ये दोन महिलांचा मृत्यू

अहमदनगर (प्रतिनिधी) – महाराष्ट्रात स्वाईन फ्लूने थैमान घातले आहे. आतापर्यंत साठहून अधिक जणांचा मृत्यू झाला आहे. त्यातच नगर जिल्ह्यात आता स्वाईन फ्लूने ग्रामीण भागातही पाय पसरण्यास सुरुवात केली आहे. त्यामुळे होणार्‍या मृत्यूचे प्रमाणही दिवसेंदिवस वाढत आहे. नगर जिल्ह्यात आतापर्यंत 15 जणांचा बळी गेला आहे. गत दोन दिवसांत सहा जणांचा बळी गेल्याने भीतीचे वातावरण पसरले आहे. यापूर्वी श्रीगोंदा तालुका 1, श्रीरामपूर 2, संगमनेर 3, कोपरगाव 3, जामखेड 2, मिरजगाव 1 असा मृत्यू झालेला आहे.

तेलकुडगाव (वार्ताहर) – नेवासा तालुक्यातील चिकणी खामगाव येथील शेतकरी सुखदेव बाबूराव खराडे (वय 50) यांचे या आजाराने नगर येथील खाजगी हॉस्पिटलमध्ये उपचारा दरम्यान मृत्यू झाला.
सुखदेव खराडे हे 9 सप्टेंबरपासून सर्दी, ताप, खोकल्याने आजारी पडले. त्यांना प्रथमोपचार घेतल्यानंतर बरे वाटले नाही. मग वडाळा येथे उपचार घेतले. नंतर त्यांच्यावर अहमदनगर येथील खासगी रुग्णालयात उपचार सुरू होते. तेथे स्वाईन फ्लू झाल्याचे निदान झाले. उपचार सुरू असतानाच त्यांचा मृत्यू झाला. शुक्रवार रोजी रात्रीच त्यांच्यावर शोकाकूल वातावरणात अंत्यसंस्कार करण्यात आले. त्यांच्या पश्‍चात मुलगा, तीन मुली, पत्नी, भाऊ-भावजय असा परिवार आहे. सकाळी तालुका आरोग्य अधिकार्‍यांना संपर्क करुन देखील दिवसभर त्यांच्याशी संपर्क होऊ शकला नाही. यामुळे ग्रामस्थांत संताप निर्माण झाला आहे. तालुक्याचा आरोग्य विभाग आतापर्यंत मोठ्या घटना घडल्याच्या नंतरच जागा झाल्याचा इतिहास आहे.
जिल्हा व तालुका आरोग्य अधिकार्‍यांना संपर्क करुन विशेष सुचना देऊन मयत सुखदेव खराडे यांच्या कुंटुबाची काळजी घेण्याचे जि. प. माजी अध्यक्ष विठ्ठलराव लंघे यांनी सांगितले.
तालुक्यात पूर्ण खबरदारी घेणार
आमच्या आरोग्य विभागाच्या अधिकार्‍यांना पाठवले असून मयताच्या सहवासातील सर्वांची तपासणी करुन सर्दी, खोकला लक्षणे आढळणार्‍या रुग्णांना (टॅमी फ्लू) गोळ्या देऊन दहा दिवस या कुटुंबाची तपासणी करुन काळजी घेण्याच्या सूचना अधिकार्‍यांना दिल्या आहेत. गावातील नागरिकांचा सर्व्हे करुन तपासणी करण्याच्या सुचनाही केल्या आहेत. जिल्हा आरोग्य अधिकारी सांगळे व तालुका आरोग्य अधिकार्‍यांनी विशेष काळजी घेण्यास सांगितले आहे.
चार उपकेंद्रांना एकच आरोग्य अधिकारी
तालुक्यातील शिरसगाव प्राथमिक आरोग्य केंद्रच्या अंतर्गत येणार्‍या वरखेड, खामगाव, गेवराई, पथारवाला हे चार उपकेंद्रची उदासिनता अनेक वेळा उघड होत आहे. याठिकाणी आरोग्य अधिकारीसह कर्मचारी राहात नसल्याने परीसरातील रुग्णांची हेळसांड होत आहे. अनेक वेळा निवेदने देऊन देखील उपयोग झाला नाही. हा परिसर गंगाथडी असल्याने या परिसरात कायमच दवाखान्याची कमतरता भासते. परिसरात अनेकवेळा वेळेवर उपचार न मिळाल्याने अनेकांना आपला जीव गमवावा लागल्याच्या घटना घडल्या आहेत.
  • जामखेड (प्रतिनिधी) – जामखेड तालुक्यातील धानोरा – वंजारवाडी येथील रूपाली बाळासाहेब शिंदे (वय-20) या गर्भवती महिलेचा नगर येथील खाजगी रुग्णालयात उपचारादरम्यान मृत्यू झाला. तीन दिवसांत स्वाईन फ्लूने तिघांचा मृत्यू झाल्याने तालुक्यात घबराटीचे वातावरण निर्माण झाले आहे. जामखेड तालुक्यातील रुपाली बाळासाहेब शिंदे या आठ महिन्यांची गर्भवतीचा अहमदनगर येथील खाजगी रुग्णालयात उपचारादरम्यान मृत्यू झाला. यामुळे तालुक्यात भीतीचे वातावरण पसरले आहे.
    जामखेड तालुक्यातील वंजारवाडी येथील रुपाली बाळासाहेब शिंदे ही पुणे येथे आपल्या कुटुंबा समवेत रहात होती. तसेच ती आठ महीन्यांची गर्भवती होती. तिला सर्दी व खोकल्याचा त्रास होऊ लागल्याने कुटुंबीयांनी तीला दि 15 सप्टेंबर रोजी कर्जत येथील उपजिल्हा रुग्णालयात उपचारासाठी दाखल करण्यात आले होते.मात्र डॉक्टरांना स्वाइन फ्लूची लक्षणे दिसल्याने तीला नगर येथे उपचारासाठी दाखल करण्यास सांगितले.यानंतर रुपालीस दि 17 सप्टेंबर रोजी अहमदनगर येथील एका खासगी रुग्णालयात दाखल करण्यात आले होते. नगर येथील डॉक्टरांनी तीच्या तपासण्या केल्या असता तीला स्वाइन फ्लूची लागण झाली आसल्याचे समजले. त्यातच रुपाली ही प्रकृती जास्त खालावत गेली आसल्याने तिचा शुक्रवारी 21 रोजी पहाटे उपचारादरम्यान मृत्यू झाला. यापूर्वी रुचिरा प्रवीण वाघमारे आणि दादासाहेब विश्वनाथ राळेभात यांचा मृत्यू झाला होता.
  • समशेरपूर (वार्ताहर) – अकोले तालुक्यातील समशेरपूर येथे एका महिलेचा स्वाईन फ्लूच्या आजाराने मृत्यू झाल्याची घटना घडली आहे. मृत्यू झालेल्या महिलेचे नाव शकिला खलील शेख (वय-52) आहे. या घटनेची दखल घेत देवठाणच्या प्राथमिक आरोग्य केंद्राचे पथक सध्या समशेरपूरमध्ये तळ ठोकून आहे.
    या महिलेने सुरवातीला समशेरपूर येथील खाजगी रुग्णालयात उपचार घेतले होते. मात्र आजार वाढतच गेल्याने तिला नाशिक येथे उपचारार्थ दाखल करण्यात आले. तिला स्वाईन फ्लू झाल्याचे निदान झाले. या आजारानेच तिचा मृत्यू झाला. देवठाण प्राथमिक आरोग्य केंद्राचे आरोग्य अधिकारी डॉ. कोळकपकर व पथकाने समशेरपूर परिसरात पाहणी केली. मात्र स्वाईनफ्लू सदृश रुग्ण आढळला नसल्याचे त्यांनी सांगितलेे. वैद्यकीय पथकाने अगस्ती विद्यालयात सर्व शिक्षक व कर्मचार्‍यांची बैठक घेतली. स्वाईन फ्ल्यू होेऊ नये यासाठी प्रतिबंधात्मक उपाययोजनांचा माहिती त्यांनी दिली.
  • समशेरपूर येथील संशयित शकीला खलील शेख यांच्या मृत्यूनंतर त्यांच्या संपर्कात आलेल्या सर्वांना टॅमी फ्लू च्या गोळ्या देण्यात आल्या आहेत. त्यांचा आजारा बाबतचा पूर्व इतिहास व अन्य माहिती जिल्हा आरोग्य अधिकार्‍यांकडे पाठविलेली आहे. प्रयोगशाळे चा अहवाल प्राप्त झाल्यानंतरच त्यांचा मृत्यू स्वाईन फ्लू ने झाला की नाही हे स्पष्ट होईल .दरम्यान खबरदारी घेतली जात आहे. पिंपळगाव निपाणी,डोंगरगाव व अन्य आवश्यक ठिकाणी आरोग्य विभागा मार्फत प्रतिबंधात्मक उपाय योजना केली जात आहे.
    -डॉ.इंद्रजित गंभीरे,तालुका आरोग्य अधिकारी
  • स्वाईन फ्ल्यू हा भयकंर आजार असून या आजाराबाबत ग्रामस्थांनी स्वत:हून पुढे येवून माहिती घ्यावी. प्रतिबंधात्मक उपाययोजना काय आहे याची माहिती घेऊन वैद्यकीय पथकाने संशयीत रुग्णांची तपासणी करावी.- भास्कर दराडे, रा. काँ. तालुका उपाध्यक्ष
  • जिल्हाधिकार्‍यांनी घेतली डॉक्टरांची बैठक –  नगर जिल्ह्यात स्वाईन फ्लूने मृत्यू पावणारांची संख्या वाढत आहे. याची जिल्हाधिकारी राहुल द्विवेदी यांनी दखल घेतली. त्यांनी काल तातडीने नगर शहरातील डॉक्टरांची बैठक घेऊन त्यांना सूचना केल्या. या बैठकीत औषधाचा साठा पुरेसा असल्याचे त्यांनी सांगितले. तसेच डॉक्टरांनी संशयित रुग्णांना व त्यांच्या नातेवाईकांना घाबरू देऊ नये. तसेच त्यांच्यावर तातडीने उपचार करावेत असे आवाहन केले. यावेळी जिल्हा शल्य चिकित्सक बापूसाहेब गाडे, झेडपीचे डॉ. संदीप सांगळे, मनपाचे डॉ. अनिल बोरगे यांच्यासह शहरातील अनेक डॉक्टर उपस्थित होते.  

LEAVE A REPLY

*