शिर्डी |शहर प्रतिनिधी| Shirdi
शिर्डी येथील श्री साईबाबा संस्थानच्या मुख्य कार्यकारी अधिकारीपदी कान्हुराज बगाटे यांची पुन्हा नियुक्ती करण्यात आली आहे.
काही दिवसांपूर्वी त्यांची मुंबई येथे अतिरिक्त मुख्य निवडणूक अधिकारी म्हणून झालेली बदली रद्द करण्यात आली आहे.
बदली झाल्यानंतरही बगाटे शिर्डीतच कार्यरत होते. त्यांच्याच पुढाकारातून शिर्डीत भाविकांसाठी भारतीय पद्धतीच्या पोषाखासंबंधीचे सूचना फलक लावण्यात आले आहेत. बगाटे यांची सुरुवातीला शिर्डी संस्थान येथे बदली झाली, तेव्हा ते आयएएस नव्हते. त्यावरून वाद उपस्थित झाला होता. त्यानंतर ते आयएएस झाले.
त्यामुळे मधल्या काळात करण्यात आलेली त्यांची बदली रद्द करून त्यांना पुन्हा शिर्डीला नियुक्ती देण्यात आली आहे. राज्यातील आठ आयएएस अधिकार्‍यांच्या बदल्यांचा आदेश सरकारने काढला आहे. त्यामध्ये बगाटे यांचा समावेश आहे. आयएएस नसताना नियुक्ती झाल्याचा वाद उपस्थित झाल्यावर सरकारने त्यांची बदली मुंबईला केली होती.
मात्र, त्यांच्या जागी शिर्डीला कोणाचीही नियुक्ती करण्यात आली नव्हती. आता पुन्हा त्यांची या रिक्त पदावर नियुक्ती करण्यात आली असून भारतीय प्रशासन सेवेत बढती मिळाल्यानंतर रिक्त पदावर नियुक्ती देण्यात येत असल्याचे आदेशात नमूद करण्यात आले आहे.
