शहादा पालिकेतर्फे घंटागाड्यांचे लोकार्पण

0
शहादा । ता.प्र. – येथील पालिकेतर्फे 13 घंटागाड्यांचे लोकार्पण जिल्हाधिकारी डॉ. मल्लीनाथ कलशेट्टी यांच्या हस्ते करण्यात आले.

घनकचरा व्यवस्थापन सविस्तर प्रकल्प अहवाल शहादा नगरपालिकेस गंटागाडीसाठी निधीतून 81 लाख 25 हजार रुपये मंजूर झाले होते. या निधीतून पालिकेने ओला व सुका कचरा संकलन करणार्‍या 13 घंटागाड्या खरेदी केल्या. या गाड्यांचे लोकार्पण जिल्हाधिकारी डॉ.मल्लीनाथ कलशेट्टी यांच्या हस्ते गुरुवारी करण्यात आले. नगराध्यक्ष मोतीलाल पाटील यांच्या अध्यक्षतेखाली झालेल्या या लोकार्पण सोहळ्यास सातपुडा साखर कारखान्याचे चेअरमन दीपक पाटील, प्रांताधिकारी लक्ष्मीकांत सातळकर,

तहसीलदार मनोज खैरनार, जि.प. सदस्य अभिजित पाटील, मुख्याधिकारी राहुल वाघ, उपनगराध्यक्षा रेखाबाई चौधरी, बांधकाम समिती सभापती संगिता योगेश चौधरी, आरोग्य समिती सभापती सायराबी सैय्यद, पाणीपुरवठा समिती ज्योती नाईक, शिक्षण समिती सभापती लक्ष्मण बढे आदी प्रमुख पाहुणे म्हणून उपस्थित होते. यावेळी दीपक पाटील म्हणाले की, नगरपालिकेने घंटागाड्यांचे चांगले पाऊल टाकले आहे. आम्ही विरोधक असलो तरी विकासात कधीही अडथळा आणणार नाही. विधायक कामासाठी, शहराच्या विकास कामांसाठी आम्ही नेहमीच सहकार्य केले आहे व यापुढेही करणार असल्याचे आश्वासन त्यांनी दिले.

जिल्हाधिकारी डॉ.कलशेट्टी म्हणाले की, शाश्वत स्वच्छतेसाठी जिल्ह्यात काम केले. पालिकेचा हा प्रकल्प अभिनंदनीय आहे. स्वच्छता कार्यक्रमात मानसिकतेत बदल आवश्यक आहे. हा बदल होत आहे पण अजून बदल अपेक्षित आहे. प्रत्येक नागरिकाने स्वच्छता मोहिमेत सहभागी झाले पाहिजे. आरोग्य आणि स्वच्छता यांचा घनिष्ठ संबंध आहे. जेथे स्वच्छता आहे तेथे आरोग्य रहाते. शहाद्याचे नागरिक जागृत नागरिक आहेत.

नगराध्यक्ष मोतीलाल पाटील अध्यक्षीय भाषणात म्हणाले की, जिल्हाधिकार्‍यांनी आम्हाला पहिल्या दिवसापासून स्वच्छता अभियान राबविण्याची प्रेरणा दिली. घंटागाडयाद्वारे ओला व सुका कचरा स्वतंत्ररित्या संकलन करुन त्यावर प्रक्रिया करण्यात येईल. प्रास्तविक अभिजित पाटील यांनी केले. पंतप्रधान नरेंद्र मोदी यांच्या स्वच्छ भारत अभियान अंतर्गत शहादा पालिकेने 13 घंटागाड्या घेऊन शहरातील कचरा संकलन करुन स्वच्छता मोहिम राबविणार असल्याचे सांगितले-. सुत्रसंचलन विष्णु जोंधळे यांनी केले. कार्यक्रमास सर्व नगरसेवक, खातेप्रमुख, अधिकारी, कर्मचारी व नागरिक मोठ्या संख्येने उपस्थित होते.

LEAVE A REPLY

*