“कुछ फोटो सच्चे भी होते है!”; मनसेने बृजभूषण अन् पवारांचे 'ते' फोटो केले शेअर, चर्चांना उधाण

“कुछ फोटो सच्चे भी होते है!”; मनसेने बृजभूषण अन् पवारांचे 'ते' फोटो केले शेअर, चर्चांना उधाण

मुंबई । Mumbai

अयोध्या (Ayodha) दौऱ्याला विरोध करण्यासाठी महाराष्ट्रातून रसद पुरवल्याचा आरोप मनसे (MNS) अध्यक्ष राज ठाकरे (Raj Thackeray) यांनी केला होता. परंतु राज यांनी कोणत्याही राजकीय पक्षाचं नाव घेणं टाळलं होतं.

त्यानंतर मनसे नेते प्रकाश महाजान (Prakash Mahajan) यांनी थेट शरद पवार (sharad pawar) यांचे नाव घेत त्यांनीच रसद पुरवल्याचा आरोप केला होता. आता मनसे नेते गजानन काळे (Gajanan Kale) यांनी फोटोज शेअर केले आहेत. यात बृजभूषण सिंह (Brij Bhushan Singh) आणि शरद पवार हे एकत्र दिसत आहेत. या फोटोची राजकीय वर्तुळात जोरदार चर्चा होत आहे. मात्र हे फोटो नेमके कधीचे आहेत याचा उल्लेख यामध्ये केलेला नाही.

फोटो नेमका कोणत्या कार्यक्रमातील?

बृजभूषण सिंह हे गेल्या अनेक वर्षांपासून भारतीय कुस्ती महासंघांचे राष्ट्रीय अध्यक्ष आहेत, तर शरद पवार हे राज्य कुस्तीगीर संघटनेचे अध्यक्ष आहेत. मनसे नेत्याने शेअर केलेले फोटो एका कुस्ती स्पर्धेतीलच असल्याचं दिसत आहे. सन्मान लाल मातीचा, बहुमान मावळवासियांचा, असं या फोटोतील बॅनरवर लिहिलेलं दिसत आहे.

राज ठाकरेंनी काय केला होता आरोप?

अयोध्या दौऱ्याला विरोध हा ट्रॅप असून महाराष्ट्रातून यासाठी रसद पुरवली जात आहे, असा आरोप राज ठाकरे यांनी पुण्यातील गणेश कला क्रीडा मंच सभागृहात बोलतांना केला होता. मला राम जन्मभूमीचं दर्शन घ्यायचं होतं. राजकारणात भावना समजत नाहीत. ऐन निवडणुकीवेळी महाराष्टातील मनसेच्या कार्यकर्त्यांमागे कोर्ट कचेरीच्या गोष्टी मागे लावल्या असत्या. उत्तर प्रदेशातील एका खासदाराला आव्हान देणं शक्य आहे का?, असा सवालही त्यांनी केला होता.

Related Stories

No stories found.
Latest Marathi News, Marathi News Paper, Breaking News In Marathi, Marathi Batmya Live
www.deshdoot.com