<p><strong>जळगाव - Jalgaon - प्रतिनिधी :</strong></p><p>महापालिकेच्या महापौर, उपमहापौर पदासाठी भाजपमध्ये रस्सीखेच सुरु असतांनाच रविवारी भाजपच्या २७ नगरसेवकांनी बंडाचा झेंडा उभारुन एक गट फुटला असून, तो सुरक्षित स्थळी रवाना झाल्याची चर्चा आहे. </p>.<p>तसेच शिवसेनेचे १५ नगरसेवकही अज्ञातस्थळी रवाना झाले आहे. दरम्यान, १८ मार्च रोजी महापालिकेच्या महापौर-उपमहापौर पदासाठी होणार्या निवडीसाठी ऑनलाईन सभेला उपस्थित राहण्याची शक्यता वर्तविली जात आहे.</p><p>खान्देश विकास आघाडीची ३५ वर्षांची सत्ता मोडीत काढीत भाजपने ५७ नगरसेवक निवडून आणून महापालिकेवर भाजपचा झेंडा रोवला. </p>.<p>सुरवातीला महापौर पद सीमा भोळे तर उपमहापौर डॉ. अश्विन सोनवणे यांना दिले होते. त्यांचा दीड वर्षांचा कार्यकाळ संपल्यानंतर महापौर भारती सोनवणे आणि उपमहापौर सुनील खडके यांना संधी दिली.</p><p>महापौर,उपमहापौर यांचा दीड वर्षांचा कार्यकाळ १८ मार्च रोजी संपुष्टात येत असून भाजपमधूनच महापौर,उपमहापौर पदासाठी मातब्बर नगरसेवकांमध्ये रस्सीखेच सुरु झाली आहे.</p>
