<p><strong>चेन्नई l Channai </strong></p><p>आज (१८ फेब्रुवारी) चेन्नईमध्ये पार पडलेल्या इंडियन् प्रीमीयर लीगच्या (IPL) १४ व्या हंगांमाच्या लिलावात अनेक धक्कादायक निर्णय पाहायला मिळाले. अनेक संघांनी कोट्यावधींच्या बोली लावत काही स्टार खेळाडू आपल्या संघात दाखल करुन घेतले.</p>.<p>दरम्यान, या लिलावात एक मजेदार दृश्य पाहायला मिळाले जेव्हा देशांतर्गत स्पर्धेत जोरदार कामगिरी करणाऱ्या शाहरुख खानला (Shah Rukh Khan) पंजाब किंग्सने (Punjab Kings) आपल्या ताफ्यात घेतलं. पंजाबने त्याच्यासाठी ५ कोटी २५ लाख मोजले. २५ वर्षीय अष्टपैलू क्रिकेटपटू असलेल्या शाहरुख खान आंतरराष्ट्रीय क्रिकेट न खेळलेला खेळाडू असल्याने त्याची या लिलावासाठी २० लाख ही मुळ किंमत होती. पण त्याच्यासाठी पंजाब किंग्स आणि रॉयल चॅलेंजर्स बेंगलोर संघात कोट्यावधी रुपयांची बोली लावण्याची स्पर्धा सुरु झाली. अखेर ५ कोटी २५ कोटी रुपयांची बोली लावत पंजाब किंग्सने त्याला आपल्या ताब्यात घेतले.</p>.<p>शाहरुख तामिळनाडू संघाकडून क्रिकेट खेळला असून त्याने ५ प्रथम श्रेणी सामने, २० अ दर्जाचे सामने व ३१ ट्वेंटी ट्वेंटी सामने खेळले आहेत. शाहरुखने प्रथम श्रेणी क्रिकेटमध्ये २३१ धावा, अ दर्जाच्या सामन्यात २८६ धावा व ३ विकेट आणि ट्वेंटी ट्वेंटीमध्ये २९३ धावा व २ विकेट घेतल्या आहेत.</p>.<p>दरम्यान, शाहरुखला ताफ्यात सामील केल्यानंतर प्रितीच्या आनंदाची सीमाच नव्हती. प्रितीचा आनंद गगनात मावेनासा झाला आणि बॉलीवूडची प्रसिद्ध अभिनेत्रींपैकी असलेली प्रिती जागेवरच नाचू लागली.</p>
