औरंगाबाद- aurangabad
डॉ.बाबासाहेब आंबेडकर मराठवाडा विद्यापीठ (Dr. Babasaheb Ambedkar Marathwada University) कॅम्पसमधील शिक्षक, शिक्षकेतर कर्मचाऱ्यांनाही (Vaccination certificate) लसीकरणाचे प्रमाणपत्र द्यावे लागणार आहे. २९ नोव्हेंबरपर्यंत प्रमाणपत्र सादर केले नाही, तर नोव्हेंबरचे वेतन थांबवले जाणार आहे. तशा प्रकारचे आदेश प्रशासनाने काढले.
कोरोना प्रतिबंधक लसीकरण वाढविण्यासाठी जिल्हा प्रशासनाकडून विविध उपाययोजना करण्यात येत आहे. जिल्हा प्रशासनाकडून लसीकरणाबाबत आलेल्या पत्रानुसार विद्यापीठाने आपल्या कर्मचाऱ्यांना कोव्हिड-१९ प्रतिबंधात्मक लसीकरणाच्या दोन्ही मात्रा घेणे बंधनकारक असल्याचे म्हटले आहे. कमीत कमी लसीकरणाची एक मात्रा घेतलेले प्रमाणपत्र घेतल्यानंतरच, पगार मिळणार आहे. प्रमाणपत्र दिल्याशिवाय वेतन मिळणार नाही अशा स्वरूपाचे पत्र विद्यापीठाने काढले. पत्रात म्हटले आहे, की जिल्हाधिकारी, आपत्ती व्यवस्थापन प्राधिकरणातर्फे आदेश दिल्याप्रमाणे लस घेणे आवश्यक आहे.
विद्यापीठातील शिक्षक, शिक्षकेतर, एकत्रित वेतन, विद्यापीठातील फंडातील वेतनावरील कर्मचाऱ्यांना नोव्हेंबर या महिन्याचे वेतन देयक मिळण्यासाठी २९ नोव्हेंबरपर्यंत लसीकरण प्रमाणपत्राची छायांकित प्रत, आधार कार्डची छायांकित प्रत व त्यावर कर्मचारी क्रमांक टाकून वेतनकक्षात जमा करण्यात यावे, ज्या शिक्षक, कर्मचाऱ्यांनी प्रतिबंधात्मक लसीकरणाची एकही मात्रा घेतली नाही किंवा कोव्हिड-१९ प्रतिबंधात्मक लसीकरण प्रमाणपत्र सादर केले नाही, अशा कर्मचाऱ्यांचे वेतन करण्यात येणार नाही. विद्यापीठात शिक्षक, शिक्षकेतर कर्मचारी, एकत्रित वेतनावर असे ९०० कर्मचारी संख्या आहे.
