मुंबई |प्रतिनिधी| Mumbai
राज्यातील वीज मंडळातील महावितरण, महानिर्मिती आणि महापारेषण या तीन कंपनीतील कंत्राटी कामगारांच्या
विविध मागण्यांसंदर्भात सकारात्मक विचार करण्यात येणार असल्याचे ऊर्जा राज्यमंत्री प्राजक्त तनपुरे यांनी सांगितले.
हाँगकाँग बँक इमारत येथे वीज मंडळातील कंत्राटी कामगारांच्या विविध मागण्यांसाठी आयोजित बैठकीत श्री.तनपुरे बोलत होते. यावेळी महावितरणचे मुख्य कार्यकारी संचालक असिम गुप्ता, महानिर्मिती श्री.खंडारे यांच्यासह पी.के. गंजो, श्री. मेनथा, श्री. गमरे यांच्यासह तीनही कंपनीचे वरिष्ठ अधिकारी उपस्थित होते.
मंत्री तनपुरे यांनी यावेळी कंत्राटी कामगारांच्या मागण्या, समस्या समजून घेतल्या. याबाबत तिन्ही कंपनीच्या वरिष्ठ अधिकारी यांनी अधिक माहिती घ्यावी, अशा सुचना देण्यात आल्या तीनही कंपन्या मिळून 38 हजार कंत्राटी कामगार कार्यरत असून कोणत्याही कामगारांना करोनाच्या पार्श्वभूमीवर कामावरून काढण्यात येवू नये, अशा सूचना देण्यात येतील. कामगारांच्या सेवा जेष्ठतेला प्राधान्य देण्यात येईल. इतरही मगण्याबाबत सकारात्मक विचार करण्यात येणार असल्याचे त्यांनी सांगितले.
ग्राम विद्युत व्यवस्थापकांना नियमित मानधन मिळणार राज्यात कार्यरत असणार्या ग्राम विद्युत व्यवस्थापकांना नियमित मानधन देण्याच्या सूचना संबंधित अधिकारी यांना देण्यात आले आहे.तसेच त्यांच्या कामात येणार्या अडचणी सोडवण्याचा प्रयत्न केला जाईल असेही त्यांनी यावेळी सांगितले.
