<p><strong>दिल्ली | Delhi </strong></p><p>अमेरिकेच्या FDA कडून फायझर (Pfizer Inc) आणि बायोएनटेक (BioNTech) च्या करोना लसीला (Covid-19 Vaccine) आपात्कालीन वापरासाठी मंजूरी देण्यात आली आहे. </p>.<p>दरम्यान, सुरूवातीपासूनच अमेरिकेला करोनाचा सर्वाधिक फटका बसल्याचं दिसत आहे. अमेरिकेत १५.५ दशलक्ष लोकांना आतापर्यंत करोनाची लागण झाली आहे. तर त्यांच्यापैकी आतापर्यंत २ लाख ९२ हजार जणांनी आपले प्राण गमावले आहेत.</p><p>जर्मनीच्या बायोएनटेक सोबत विकसित केलेली ही लस करोनावर 95% प्रभावी असल्याचे अंतिम चाचण्यांमधून दिसून आले आहे. ही लस 16 आणि पुढील वयोगटातील व्यक्तींना देण्यात येईल, असे FDA ने सांगितले. तसंच लसीकरणाच्या पहिल्या टप्प्यात 29 लाख डोसेस देण्यात येणार असून आरोग्यसेवक आणि वृद्धांना प्राधान्य देण्यात येणार आहे. </p><p>अमेरिकेने करोनावरील लस तयार करणारी कंपनी मॉडर्नाकडूनही १०० दशलक्ष डोस विकत घेण्याचा निर्णय घेतला आहे. दरम्यान, शुक्रवारी अमेरिकन सरकारच्या सल्लागार समितीनं फायझरच्या करोना लसीच्या आपात्कालिन वापरास परवानगी दिली. या मुद्दावर झालेली बैठक तब्बल आठ तास सुरु होती. बैठकीदरम्यान एफडीएच्या सल्लागार समितीच्या सदस्यांनी १७ विरूद्ध ४ मतांनी लसीच्या आपात्कालिन वापरास मंजुरी दिली. तर एक सदस्या या प्रक्रियेत सहभागी झाला नव्हता.</p><p>सध्या फायझरच्या लसीला मिळालेली परवानगी ही अंतरिम परवानगी आहे. कंपनीला अमेरिकेत लसीची विक्री करण्यासाठी आणखी एकदा अर्ज करावा लागणार आहे. या लसीमुळे सध्या जो फायदा होणार आहे तो या लसीच्या संभावित दुष्परिणामांपेक्षा अधिक आहे. त्यासाठी या लसीच्या आपात्कालिन वापरास परवानगी देण्यात आली आहे, असं एका तज्ज्ञानं सांगितलं. यापूर्वी फायझरच्या लसीच्या आपात्कालिन परिस्थितीतील वापरास ब्रिटन, कॅनडा, बहरिन आणि सौदी अरेबियानं मंजुरी दिली होती. भारतातही यासाठी कंपनीनं परवानगी मागितली आहे. दरम्यान, भारतातही फायझरने आपात्कालीन वापरासाठी अर्ज केला आहे. लवकरच या लसीला मंजूरी मिळेल अशी आशा आहे.</p>
