<p><strong>दिल्ली l Delhi </strong></p><p>जम्मू काश्मीरमधील अनंतनामध्ये पोलिसांनी मोठी कारवाई केली आहे. पोलिसांनी केलेल्या कारवाईत ६ दहशतवाद्यांना अटक केली आहे. तसेच मोठ्या प्रमाणात दारुगोळा आणि शस्त्रसाठाही जप्त करण्यात आला आहे.</p>.<p>अनंतनाग पोलिसांनी केलेल्या कारवाईत सहा दहशतवाद्यांना अटक करण्यात यश मिळाले आहे. हे दहशतवादी लष्कर ए मुस्तफा आणि जैश ए मोहम्मद या संघटनेचे असल्याचे सांगण्यात येत आहे. यामध्ये लष्कर ए मुस्तफाच्या २ तर जैश ए मोहम्मदच्या ४ जणांचा समावेश आहे. या दहशतवाद्यांकडून मोठ्या प्रमाणावर शस्त्र व दारूगोळा जप्त करण्यात आला आहे.</p>.<p>या अगोदर जम्मू-काश्मीरच्या त्राल सेक्टरमध्ये दहशतवादी आणि सुरक्षा दलांमध्ये झालेल्या चकमकीत तीन दहशतवादी ठार झाले. हे दहशतवादी हिज्बुल मुजाहिद्दीन या दहशतवादी संघटनेशी संबंधित असल्याची माहिती काश्मीरचे पोलीस महानिरीक्षक विजय कुमार यांनी दिली. त्राल येथे दहशतवादी लपून बसले असल्याची माहिती सुरक्षा दलांना मिळाली होती. त्यानंतर भारतीय सैन्य दल, स्थानिक पोलीस आणि केंद्रीय राखीव सुरक्षा दलाच्या पथकांनी संयुक्तपणे शोधमोहीम हाती घेतली होती. त्रालमधील एका परिसरात शोधमोहिम सुरू असताना दहशतवाद्यांकडून गोळीबार सुरु झाला. गोळीबाराला प्रत्युत्तर म्हणून सुरक्षा दलानेही गोळीबार केला. त्यात तीन दहशतवाद्यांना कंठस्नान घालण्यात सुरक्षा पथकाला यश आले.</p>
