<p><strong>दिल्ली l Delhi </strong></p><p>देशात गेल्या २४ तासात तब्बल २४ हजारांहून अधिक करोना रुग्ण आढळून आले आहेत. मागील दोन दिवसांच्या तुलनेत आज रुग्णांमध्ये वाढ झाली असल्याचे दिसून येत आहे. दरम्यान, गेल्या चोवीस तासात मृतांचा आकडा हा तीनशेच्या घरात गेला आहे.</p>.<p>आरोग्य मंत्रालयाने दिलेल्या माहितीनुसार, आतापर्यंत १ कोटी १ लाखांहून अधिक जणांना करोनाची लागण झाली आहे. गेल्या २४ तासात देशात २४ हजार ७१२ नवे रुग्ण आढळून आले आहेत. तर देशात ३१२ करोना बाधित रुग्णांचा मृत्यू झाला आहे. सध्या देशभरात २ लाख ८३ हजार अॅक्टिव्ह रुग्ण आहेत. आतापर्यंत देशात एकूण १ लाख ४६ हजाराहून अधिक करोना बाधितांचा मृत्यू झाला आहे. आतापर्यंत देशात एकूण १ कोटी ०१ लाख २३ हजार ७७८ रुग्ण सापडले आहेत. त्यापैकी १ लाख ४६ हजार ७५६ रुग्णांचा मृत्यू झाला आहे.</p>.<p>दरम्यान करोनाचा नवा प्रकार आढळून आल्यानं ब्रिटनमध्ये प्रचंड भीतीचं वातावरण निर्माण झालं आहे. करोनाच्या या नव्या प्रकाराचा संक्रमण वेग जास्त असल्यानं इतर देशांनीही ब्रिटनहून येणारी विमान थांबवली आहेत. भारतात बुधवारपासून (२३ डिसेंबर) ब्रिटनमधून येणारी विमान बंद केली असून, त्यापूर्वी आलेल्या प्रवाशांपैकी पाच करोना पॉझिटिव्ह रुग्णांनी विमानतळावरूनच पोबारा केला. दिल्ली विमानतळावर ही घटना घडली. ब्रिटनमधून येणाऱ्या प्रवाशांसाठी केंद्र सरकारनं विशेष मार्गदर्शक सूचना जारी केल्या आहेत. या प्रवाशांना आरटी-पीसीआर चाचणी सक्तीची करण्यात आली आहे. असं असलं तरी ब्रिटनहून दिल्लीत आलेल्या पाच प्रवाशांनी विमानतळावर उतरल्यानंतर अधिकाऱ्यांना चकमा देत पळ काढला.</p><p>ही घटना समोर आल्यानंतर प्रशासनानं तातडीने त्यांचा शोध सुरू केला. त्यातील तीन जणांना शोधण्यात प्रशासनाला यश आलं. रात्रीच त्यांना दिल्लीतील लोकनायक रुग्णालयात दाखल करण्यात आलं. दुसरीकडे एक करोनाबाधित लुधियाना तर दुसरा आंध्र प्रदेशात जाण्यात यशस्वी ठरला. त्यांनाही बुधवारी अधिकाऱ्यांनी परत आणलं आहे. पाचही जणांना क्वारंटाइन करण्यात आलं आहे. पाच पैकी एकजण अमृतसर येथील पंडोरी गावातील ४६ वर्षीय व्यक्तीचा मुलगा असून, तो ब्रिटनहून परत आला होता. त्याचा करोना रिपोर्ट पॉझिटिव्ह आला होता. त्यानंतरही तो दिल्ली विमानतळावरून लुधियानापर्यंत पोहोचण्यात यशस्वी ठरला. लुधियानात पोहोचल्यानंतर तो खासगी रुग्णालयात दाखल झाला होता. बुधवारी सकाळी त्याला पुन्हा दिल्लीला पाठवण्यात आलं.</p>
