<p><strong>नवी दिल्ली - </strong></p><p>करोना प्रतिबंधक लस घेताना दिल्लीतील एम्सचे संचालक डॉ. रणदीप गुलेरिया आणि पुण्यातील सीरम इन्स्टिट्यूटचे प्रमुख </p>.<p>अदर पुनावाला यांनी मास्कचा वापर न केल्याने करोना नियमांचे उल्लंघन केले आहे. भारतात आज शनिवारपासून (16 जानेवारी) करोना प्रतिबंधक लसीकरणाला सुरुवात झाली आहे. करोना योद्ध्यांना म्हणजेच वैद्यकीय कर्मचार्यांना अगोदर करोना लस देण्यात येत आहे. पंतप्रधान नरेंद्र मोदींनी याबाबत आपले मनोगत व्यक्त केले. त्यामध्ये त्यांनी जरी लसीकरण होत असले तरी मास्क वापरणे गरजेचे असल्याचे सांगितले आहे. मात्र काही मान्यवर लस घेताना मास्कचा वापर करत नसल्याचे दिसून आले आहे.</p><p>विशेष म्हणजे सिरम इन्स्टिट्यूटचे प्रमुख अदर पुनावाला यांनी आज करोनावरील लस घेतली. त्यांनीही तोंडावर मास्क घातलेला नव्हता. तसेच दिल्लीतील एम्सचे संचालक डॉ. रणदीप गुलेरिया यांनीही लस घेतली. मात्र त्यावेळी त्यांनी मास्क काढला होता. इतरही काही ठिकाणी असे खबरदारी न घेतल्याचे प्रकार आढळून आले.</p><p>ही बाब आरोग्य नियमांचे उल्लंघन करणारी आहे असे पंतप्रधानांनी त्यांच्या मनोगतामध्ये सांगितले होते. त्यातच करोना विरुद्धच्या युद्धात ज्यांनी हिरीरीने काम केले त्या दोन प्रमुख करोना योध्यांनीच अशाप्रकारे मास्क काढून नियम डावलल्याचे दिसून आले.</p><p>दरम्यान, कोणत्याही करोना प्रतिबंधक नियमावलीची पायमल्ली होता कामा नये याची खबरदारी सर्वांनीच घेतली पाहिजे. त्याचवेळी ज्यांचा आदर्श आणि ज्यांच्या सूचनांचे पालन आपण करतो, त्याच मान्यवरांनी खबरदारी घेतली नाही तर चुकीचा संदेश जाण्याची शक्यता आहे. त्यामुळे करोना योद्ध्यांनीच लस घेताना काळजी घेतली पाहिजे.</p>
