औरंगाबाद : Aurangabad
दारूड्या मुलाच्या मारहाणीच्या तावडीतून सुनेची सुटका करताना आई आणि नातेवाईकांच्या हातून मुलालाच खून झाल्याची घटना आसेगावात घडली. कृष्णा श्यामराव शेळके (वय ३५) असे मृताचे नाव आहे. या प्रकरणी मृताच्या आईसह नातेवाईकांना...
पोलिसांनी बेड्या ठोकल्या. दौलताबाद पोलिसांकडून दिलेल्या माहितीनुसार, कृष्णा शेती करायचा. त्याला दारूचे व्यसन होते. दारूच्या नशेत तो पत्नी आणि मुलांना बेदम मारहाण करायचा. कृष्णा सोमवारी (२ नोव्हेंबर) दुपारी दोनच्या सुमारास दारू पिऊन आला. त्याने पत्नीला बेदम मारहाण करण्यास सुरुवात केली. त्यामुळे सुनेच्या मदतीसाठी कृष्णाची आई केशरबाई शेळके धावून गेली. कृष्णाने पत्नीला मारहाण करण्याचे सोडून आईलाही मारहाण करण्यास सुरुवात केली. हे पाहून कृष्णाची पत्नी मदतीसाठी ज्ञानेश्वर रत्नाकर जाधव यांच्याकडे गेली. त्यांचे दुसरे नातेवाईक पंढरीनाथ बाबूराव जाधव यांना बोलविण्याचा निरोप दिला. काही वेळात पंढरीनाथ जाधव कृष्णाच्या घरी पोहोचले. त्यावेळीही घराचा दरवाजा बंद करून कृष्णा आपल्या आईला मारहाण करित होता. पंढरीनाथ यांनी दरवाजा तोडून घरात प्रवेश केला. तुटलेल्या दरवाज्याची फळी घेऊन आई केशरबाई शेळके यांनी कृष्णाला मारहाण केली. यावेळी पंढरीनाथ जाधव यांनीही कृष्णाला मारले. या मारहाणीत कृष्णा मृत्यू झाला. घटनेचा तपास दौलताबाद पोलिस ठाण्याच्या पोलिस निरीक्षक राजश्री आडे या करत आहेत.
खुनाची पाचवी घटना
घटनेची माहिती मिळताच घटनास्थळी पोलिस उपायुक्त नीकेश घाटमोडे, दौलताबाद पोलिस ठाण्याच्या पोलिस निरीक्षक राजश्री आडे, पोलिस उपनिरीक्षक कदम पोहोचले. त्यांनी प्राथमिक माहितीवरून मृत कृष्णाची आई केशरबाई शेळके आणि पंढरीनाथ बाबूराव जाधव या दोघांना अटक केले आहे.
कृष्णाच्या पत्नीच्या तक्रारीवरून केशरबाई शेळके आणि पंढरीनाथ जाधव या दोघांविरोधात गुन्हा दाखल करण्यात आला आहे. दरम्यान, गेल्या दोन महिन्यांत शहरात ही पाचवी खुनाची घटना आहे. दौलताबाद परिसरात खुनाची ही दुसरी घटना आहे. यापूर्वी एमआयडीसी वाळूजमध्ये एक, तर छावणी पोलिस ठाण्याच्या हद्दीत दोन खुनाच्या घटना घडल्या आहेत.