<p><strong>नाशिक | प्रतिनिधी </strong></p><p>अखिल भारतीय मराठी चित्रपट महामंडळाच्या अध्यक्षपदाचा वाद अखेर शमला. मेघराज राजेभोसले यांच्या नावावर पुन्हा एकदा संचालक मंडळाने विश्वास व्यक्त करत यापुढे अध्यक्ष म्हणून मेघराज राजेभोसलेच काम पहाणार असल्याची माहिती देण्यात आली आहे...</p>.<p>२६ नोव्हेंबरला कोल्हापूर येथे झालेल्या महामंडळाच्या कार्यकारिणी बैठकीत अध्यक्ष मेघराज राजेभोसले यांच्यावर अविश्वास ठराव मांडण्यात आला होता. ज्यामध्ये तेरा संचालकांपैकी आठ संचालकांनी राजेभोसले यांच्या राजीनाम्याची मागणी करीत अविश्वास व्यक्त केला होता.</p><p>त्यावेळी प्रभारी अध्यक्ष म्हणून विद्यमान उपाध्यक्ष धनाजी यमकर यांची निवड करण्यात आली होती. त्यावेळी लवकरच पुढील बैठक घेऊन नवीन अध्यक्ष निवडले जातील असे प्रमुख कार्यवाह सुशांत शेलार यांनी सांगितले होते.</p><p>मात्र बुधवार (९ डिसेंबर २०२०) रोजी मुंबई येथे संपन्न झालेल्या संचालक मंडळाच्या बैठकीमध्ये सुशांत शेलार व निकिता मोघे यांनी मेघराज राजेभोसले यांना पाठिंबा दिल्यामुळे अविश्वास ठराव नामंजूर झाला.</p><p>यावेळी अध्यक्ष मेघराज राजेभोसले, उपाध्यक्ष धनाजी यमकर, विजय खोचीकर, प्रमुख कार्यवाह सुशांत शेलार, सहकार्यवाह चैत्राली डोंगरे, निकिता मोघे, खजिनदार संजय ठुबे, सहखजिनदार शरद चव्हाण, संचालक पितांबर काळे, सतीश रणदिवे, सतीश बिडकर, वर्षा उसगांवकर, रणजित तथा बाळा जाधव,रवींद्र गावडे, रत्नकांत जगताप उपस्थित होते.</p>
