औरंगाबादकरांना मोठा दिलासा; रुग्णसंख्या घटली

७८ हजार ४२८ जण बरे होऊन घरी परतले
औरंगाबादकरांना मोठा दिलासा; रुग्णसंख्या घटली

औरंगाबाद- गेल्या आठ दिवसांत (१ मेपासून) औरंगाबाद शहरातील कोरोनाबाधितांची संख्या १९७१ ने घटली आहे. रुग्णसंख्येचा घटता आलेख काही दिवसांपासून स्थिर असल्यामुळे शहरवासीयांना दिलासा मिळाल्याचे चित्र आहे. प्रशासकीय यंत्रणा देखील यामुळे सुखावली आहे.

औरंगाबाद शहरात फेब्रुवारी महिन्याच्या दुसऱ्या आठवड्यापासून कोरोनाची दुसरी लाट सुरु झाली. मार्च आणि एप्रिल महिन्यात कोरोनाबाधितांच्या वाढत्या संख्येने चिंतेचे वातावरण निर्माण केले होते. दररोज एक हजार आणि त्यापेक्षा जास्त रुग्ण आढळून येत होते, त्यामुळे महापालिका आणि जिल्हा प्रशासनासमोर वाढती रुग्ण संख्या नियंत्रणात आणण्याचे मोठे आव्हान होते. राज्य सरकारने 'ब्रेक द चेन' अंतर्गत लागू केलेल्या संचारबंदीचा फायदा घेत महापालिका प्रशासनाने निर्बंधांची कठोरपणे अंमलबजावणी करण्यावर भर दिला. त्याला जिल्हा प्रशासन व पोलीस प्रशासनाने साथ दिली. शहराच्या एन्ट्री पॉइंटवर आणि शहरातील नाकाबंदीच्या पॉइंटवर कोरोना चाचणी सुरू करण्यात आली. संचारबंदीच्या काळात विनाकारण फिरणाऱ्यांवर देखील कारवाईचा बडगा उगारण्यात आला, प्रामुख्याने त्यांची कोरोना चाचणी करण्यात आली. त्याचाही धाक नागरिकांमध्ये बसल्यामुळे रुग्ण संख्या कमी होण्यास मदत झाल्याचे पालिकेच्या आरोग्य विभागाचे निरीक्षण आहे.

पालिकेकडून मिळालेल्या माहितीनुसार शहरात १ मे रोजी ४ हजार १७१ सक्रीय (अँक्टिव्ह) रुग्ण होते. त्यातील १५१० रुग्ण गृहविलगीकरणात होते. कोविड केअर सेंटरमध्ये १०१०, मेल्ट्रॉन येथील डेडिकेटेड कोविड हेल्थ सेंटरमध्ये २३५, खासगी रुग्णालयात १०९६, जिल्हा सामान्य रुग्णालयात १४० तर घाटी रुग्णालयात १८० रुग्ण दाखल होते. पालिकेच्या ८ मे च्या अहवालानुसार सक्रीय रुग्णांची संख्या २२०० इतकी आहे. त्यातील गृह विलगीकरणात ८०५, कोविड केअर सेंटरमध्ये ६५०, मेल्ट्रॉन येथील कोविड हेल्थ सेंटरमध्ये १७५, खासगी रुग्णालयात ३७०, जिल्हा सामान्य रुग्णालयात ९५ तर घाटी रुग्णालयात १०५ रुग्ण उपचार घेत आहेत. शहरात आतापर्यंत ८२ हजार ३२६ करोनाबाधित आढळले असून त्यांच्या पैकी ७८ हजार ४२८ जण बरे होऊन घरी परतले आहेत.

No stories found.
Latest Marathi News, Marathi News Paper, Breaking News In Marathi, Marathi Batmya Live
www.deshdoot.com