नेवासा |तालुका प्रतिनिधी| Newasa
कोव्हिड -19 विषाणूमुळे झालेल्या लॉकडाऊनमुळे बी-हेवी मळीपासून निर्मित जलरहित मद्यार्काची (इथेनॉल) उचल होत नसल्याने बी-हेवी मळीपासून आरएस (शुध्द मद्यार्क ) व इएनए(अतिशुध्द मद्यार्क) उत्पादन घेण्यास व सदर मद्यार्क देशी-विदेशी मद्यार्क निर्मितीसाठी वापरण्यास परवानगी मिळणेबाबत अनेक आसवण्यानी राज्य सरकला केली होती.ती मान्य होऊन बी-हेवी मळीपासून तयार मद्यार्क देशी-विदेशी मद्यनिर्मितीसाठी वापरण्याची परवानगी राज्याचे गृहविभागाने दिली आहे.
याबाबत गृह विभागाने दि. 20 मे रोजी शासनाच्यावतीने एक पुरकपत्र जारी केले आहे. त्यात म्हटले आहे की, केंद्र शासनाच्या ग्राहक, अन्न आणि सार्वजनिक वितरण विभागाच्या संदर्भ 1, 2 व 3 मधील मार्गदर्शक सूचनांनूसार राज्यात साखर, साखरेचा पाक, उसाचा रस, बी-हेवी / सी-हेवी मळीपासून इथेनॉल निर्मितीकरुन त्याची साठवणूक व विक्रीबाबत धोरण संदर्भ क्र.4 नुसार निश्चित करण्यात आले आहे.
आता कोव्हिड -19 विषाणूमुळे झालेल्या लॉकडाऊनमुळे बी-हेवी मळीपासून निर्मित जलरहित मद्यार्काची (इथेनॉल) उचल होत नसल्याने बी-हेवी मळीपासून आरएस (शुध्द मद्यार्क) व इएनए (अतिशुध्द मद्यार्क) उत्पादन घेण्यास परवानगी मिळणेबाबत अनेक आसवनी घटकांनी विनंती केली आहे. संदर्भ क्र.4 मधील अटी व शर्ती पाहता आसवनी घटकांना बी-हेवी मळीपासून इथेनॉल व्यतिरिक्त आर.एस. (शुध्द मद्यार्क ) व इ.एन.ए. (अतिशुध्द मद्यार्क) उत्पादन व विक्री करिता कोणताही अडसर नाही. त्यामुळे उत्पादनाचे (इथेनॉल व्यतिरिक्त) स्वातंत्र्य संबंधीत घटकास आहे.
मात्र असे करताना संबंधित घटकाने, केंद्र शासनाच्या धोरणानुसार तेल विपणन कंपन्यांशी इथेनॉल पुरवठ्याबाबत काही करार केले असल्यास व त्याची पुर्तता न झाल्यास अशा दायित्वाची सर्वस्वी जबाबदारी संबंधित घटकांची राहील व याबाबत राज्य शासनाचे कोणतेही दायित्व राहणार नाही असे ही शासनाकडून स्पष्ट करण्यात आलेले आहे.