नाशिक । प्रतिनिधी
नाशिक महानगरपालिके मार्फत शहरातील विविध भागांमध्ये करोनाचा प्रादुर्भाव रोखणे व प्रतिबंधात्मक उपाययोजना म्हणुन वैद्यकीय विभागाचे पथक व मनपाच्या अंगणवाडीतील सेविका व मदतनीस यांचे मार्फत घरोघरी जाऊन करोनाच्या विषाणुमुळे होणाऱ्या आजाराबाबत सर्व्हे करण्यात येत आहे.या सर्व्हेमध्ये महानगरपालिकेच्या सर्व विभाग मिळुन १२४ अंगणवाडी सेविका व मदतनीस सहभागी झाल्या आहेत.
सदर सेविका व मदतनीस यांना जागतिक आरोग्य संघटनेने केलेल्या आरोग्य विषयक सुचनांचे पालन करुन उपाय योजना केल्या आहेत. सर्व्हे करतांना संरक्षक उपकरणे (पीपीई किटस्) वैद्यकीय विभागामार्फत पुरविण्यात आलेले आहे. अंगणवाडी सेविका व मदतनीस हया करोना दरम्यान जीव धोक्यात घालुन काम करत असल्याने वैद्यकीय विभागामार्फत २५ लाखाचे विमा संरक्षण देण्यात आले आहे.
मा.केंद्र शासनाचे गृहमंत्रालयातील आदेश क्रमांक४०-३/२०२०-डीएम-आय (अे ) दिनांक १५ एप्रिल २०२० चे आदेशान्वये करोना विषाणु प्रादुर्भाव व प्रतिबंधात्मक उपाय योजना अंतर्गत अंगणवाडीत बालकांना घरपोच सकस आहार पुरविणेबाबत सुचना देण्यात आल्या आहेत.त्यानुसार नाशिक महानगरपालिकेच्या ऐच्छिक कार्यक्रमांतर्गत एकुण ३५७ अंगणवाडया कार्यरत आहेत.त्यात सुमारे १२००० बालके शिक्षण घेत आहेत.
करोना संचारबंदीच्या काळात मा.महाराष्ट्र शासनाच्या निर्देशानुसार मनपाच्या सर्व अंगणवाडया बंद ठेवण्यात आल्या होत्या. त्यामुळे मनपाच्या कार्यरत असलेल्या अंगणवाडीतील बालकांना शासन निर्देशानुसार सकस आहार घरपोच पोहचविण्याचा निर्णय घेऊन सकस आहारात शेंगदाणे,गुळ ,कच्ची मटकी व केळी या प्रकारचा सकस आहार अंगणवाडी सेविका व मदतनीस यांचे मार्फत घरपोच वाटप करण्यात येत आहे.
वाटप करणाऱ्या अंगणवाडी सेविका व मदतनीस यांना जागतिक आरोग्य संघटनेच्या निर्देशानुसार दक्षता घेवुन मनपा मार्फत मास्क ,सॅनिटायझर,हॅन्डग्लोव्हज् या सारखे (पीपीई कीटस्) उपलब्ध्‍ करुन देण्यात आलेले आहेत. सकस आहाराचे वाटप करतांना वैयक्तीक अंतर (फिजीकल डिस्टंन्स ) राखुन व दिलेले शरीर संरक्षक उपकरणे /संरक्षक उपकरणांचा ( पीपीई किटस् ) चा वापर करुनच सर्व अंगणवाडी सेविका व मदतनीस यांनी सकस आहाराचे वितरण करणे बाबत सुचना देण्यात आलेल्या असुन त्याबाबत दक्षता घेण्यात येत आहे.
नाशिक शहरातील जो भाग कोरोना विषाणु (कोविड-१९) चा प्रादुर्भाव रोखण्यासाठी प्रतिबंधित क्षेत्र म्हणुन घोषित केले आहे ते क्षेत्र वगळुन सकस आहाराचे वितरण करण्यात येत आहे.
