Type to search

Featured नाशिक मुख्य बातम्या विधानसभा निवडणूक २०१९

सोशल मीडियावर शुभेच्छांचा वर्षाव; उमेदवारांनी साधली विजयादशमीची पर्वणी

Share

नाशिक । प्रतिनिधी

विधानसभेच्या प्रचाराचा नारळ उमेदवारांनी अधिकृतरीत्या सोशल मीडियावर वाढवला आहे. बॅनर, घोषणा, पत्रके या पारंपरिक साधनांऐवजी या निवडणुकीत उमेदवारांनी सोशल मीडियाला पसंती दिली आहे. विजयादशमीला तर सर्वच राजकीय पक्षांकडून मेसेज, व्हॉटस्अ‍ॅप, फेसबुकवर शुभेच्छांचा वर्षाव सुरू होता.

दसर्‍याचा मुहूर्त साधत सर्वच उमेदवारांनी आपापल्या मतदारसंघातील मतदारांपर्यंत पोहोचण्याचा प्रयत्न केला. तर राजकीय पक्षांचे कार्यकर्ते आणि उमेदवारदेखील ऑनलाईन प्लॅटफॉर्मवर आपल्या उमेदवारांचा प्रचार करण्यात व्यस्त दिसले. उमेदवारांंनी छायाचित्रांसह वेगवेगळ्या कोटस् मेसेजेस आणि वेगवेगळ्या स्टाईलसहित आपल्या प्रतिमा शेअर केल्या.

राजकीय पक्ष, राजकारणी, कार्यकर्ते आणि अगदी निवडणूक आयोग यांना असे दिसून आले आहे की, सोशल मीडिया हे मतदारांपर्यंत पोहोचण्याचे सर्वात प्रभावी साधन आहे. सोशल मीडिया वापरण्याची किंमत ही अतिशय कमी असूनसुद्धा त्याची व्याप्ती खूप मोठी आहे. सोशल मीडियामुळे केवळ एका क्लिकवर लाखो लोकांपर्यंत पोहोचणे शक्य होते. व्हॉटस्अ‍ॅप प्रचारातील सर्वात महत्त्वाचे सोशल मीडिया प्लॅटफॉर्म म्हणून उदयास आले आहे. व्हॉटस्अ‍ॅपवर काही निर्बंध लावले गेले असले तरी प्रतिमा, मजकूर, संदेश आणि व्हिडीओ शेअर करण्यासाठी हे सर्वात उपयुक्त स्मार्टफोन अ‍ॅप्लिकेशन आहे.

या निवडणुकीत बंडखोर उमेदवारांनीदेखील सोशल मीडिया प्लॅटफॉर्मचा पुरेपूर फायदा घेतला. बंडखोरी करून दुसर्‍या पक्षात जाण्याची बातमी त्यांनी सोशल मीडियाच्या माध्यमातूनच दिली. कोणत्याही उमेदवाराच्या बंडखोरीच्या बातम्या बॅनरऐवजी या सोशल मीडिया प्लॅटफॉर्मवर आल्या. उमेदवारांनी त्यांच्या नवीन पार्टी चिन्हासह त्यांच्या प्रतिमा बनवल्या आणि सोशल मीडियावर अपलोड केल्या.

फेसबुक पेजची क्रेझ
सोशल मीडिया प्लॅटफॉर्मवर स्वतःचे फेसबुक पेज तयार करण्यात उमेदवार गुंग झाले आहेत. फेसबुक पेजचा वापर करून ऑनलाईन सर्वेक्षण करता येते. त्याचप्रमाणे प्रचारासाठी मजकूर, मेसेज, व्हिडीओ, सचित्र संदेश यांचाही वापर केला जाऊ शकतो. उमेदवार आता थेट त्यांच्या संपर्कात असलेल्या लोकांशी संवाद साधू शकतो. फेसबुक लाईव्ह फिचर ही आणखी एक नवीन गोष्ट आहे जी उमेदवार आपली मते शेअर करण्यासाठी किंवा निवडणूक प्रचारावर बोलण्यासाठी वापरत आहेत. या फेसबुक लाईव्हवरही एखादी सभा किंवा महत्त्वाची घोषणा उमेदवार करू शकता.

सोशल मीडिया सेल
जिल्हा प्रशासनाने विशेषत: राज्य विधानसभा निवडणूक २०१९ यासाठी एक विशेष सोशल मीडिया मॉनिटरींग सेल तयार केला आहे. जिल्हा प्रशासन सोशल मीडिया प्लॅटफॉर्मवर आणि ऑनलाईन प्लॅटफॉर्मवर उमेदवारांच्या उपक्रमांवर कडक नजर ठेवेल. याअंतर्गत आचारसंहितेचा भंग केल्यास गुन्हे दाखल करणार असल्याचे प्रशासनाचे म्हणणे आहे.

 

Tags:

You Might also Like

Leave a Comment

Your email address will not be published. Required fields are marked *

*

error: Content is protected !!