नदीघाट विकास प्रकल्पासाठी 65 कोटी

0

शहादा। ता.प्र.- शहादा शहरासाठी नदीघाट विकास प्रकल्पांतर्गत 65 कोटींच्या निधीच्या मागणीला केंद्रीयमंत्री नितीन गडकरी यांनी मंजूरी दिली आहे. या अभिनव योजनेची जिल्हा परिषद सदस्य अभिजित पाटील यांनी मागणी केली होती. तसेच खा.डॉ.हिना गावित यांच्या पाठपुराव्याला यश आले आहे.

शहादे शहरालगत गोमाई नदी वाहते. नदीच्या काठावर काही वसाहती आहेत. दरम्यान, जुने तिखोरा पूल ते पिंगाणा पूल दरम्यान नदी घाट विकास प्रकल्पांतर्गत सुमारे 65 कोटींच्या निधीची मागणी शहादा पालिकेतर्फे केंद्रशासनाकडे करण्यात आली आहे. त्यासंबंधीचे प्रस्ताव व निवेदन खा.डॉ.हिना गावित, जि.प.सदस्य अभिजीत पाटील, नगरसेवक आनंदा पाटील, संदीप पाटील, नाना निकुंबे, संतोष वाल्हे, निलेश पाटील,

संजय साठे, रेखा पटेल, जितू जमदाडे, रिमा पवार, साजीदअन्सारी आदींच्या वतीने संबंधित खात्याचे मंत्री नितीन गडकरी यांना दिल्ली येथे प्रत्यक्ष भेटून निवेदन व प्रस्ताव देण्यात आला.अशा स्वरूपाच्या महत्त्वाकांक्षी प्रकल्पातून नदीकाठावरील गावात रहिवाशांच्या समस्या सुटणार आहेत. असा महत्त्वाकांक्षी प्रकल्प राबवणारी ब वर्ग नगरपालिका राज्यातील एकमेव नगरपालिका असू शकते असा सूर यावेळी भेटीदरम्यान उमटला.

या प्रकल्पामुळे गोमाई नदीकाठावरील रहिवाशांना संरक्षण मिळण्यासोबत शहराच्या क्षेत्रफळातसुद्धा लक्षणीय वाढ होणार आहे. त्यामुळे शहराच्या वाढत्या लोकसंख्येला अतिरिक्त जागा उपलब्ध होऊ शकते. त्याचबरोबर शहराला 60 दिवस पुरेल असा पाण्याचा अतिरिक्त साठा उपलब्ध होईल अशीसुद्धा तरतूद या प्रकल्पांतर्गत होणार आहे. ना.नितीन गडकरी यांनी येणार्‍या फेब्रुवारीचा संसदेच्या अधिवेशनात सकारात्मक निर्णय घेऊन शहराच्या सौंदर्य करण्यासाठी अधिकाधिक निधी देण्याचा प्रयत्न राहील, असे आश्वासित केले.

यावेळी डॉ.हिना गावित म्हणाल्या की, अधिकाधिक निधी मिळवून विकास कामे करण्यासाठी मी सातत्याने पाठपुरावा करत आहे. शहादा नगरपालिकेच्या विकास कामांना सर्वतोपरी मदत करण्याचे आश्वासन दिले.

केंद्र शासनाने या मागणीचा सकारात्मक विचार केल्याचा निश्चितच आनंद आहे. त्यामुळे शहादा शहराची प्रतिमा देशपातळीवर जाईल यात कुठलीही शंका नाही.शहराच्या सौंदर्यकरणासाठी अधिकाधिक विकास व्हावा यासाठी प्रयत्न आहेत.
– अभिजित दादा पाटील,
जि. प. सदस्य

LEAVE A REPLY

*