युवा सेनेच्या जिल्हाध्यक्षाला मारहाण

अहमदनगर |प्रतिनिधी| Ahmednagar

येथील स्वराज्य सामाजिक प्रतिष्ठानचे अध्यक्ष तथा युवा सेनेचे जिल्हाध्यक्ष योगेश गलांडे यांना मारहाण करण्यात आली आहे. मारहाणीत गलांडे जखमी झाले आहेत. त्यांच्यावर येथील एका खासगी रूग्णालयात उपचार सुरू आहेत. त्यांच्या जबाबावरून मारहाण करणार्‍यांवर गुन्हा दाखल करण्यात येणार असल्याचे एमआयडीसी पोलीस ठाण्याचे सहायक निरीक्षक राजेंद्र सानप यांनी सांगितले.

गलांडे हे सोमवारी दुपारी एमआयडीसी परिसरात असताना त्यांना भळगट हॉटेलजवळ एक जणाकडून मारहाण करण्यात आली. मारहाणीत गलांडे जखमी झाले. त्यांना उपचारासाठी रूग्णालयात दाखल करण्यात आले.

दुपारी एक ते दीड वाजेच्या दरम्यान ही घटना घडली आहे. मारहाण करणार्‍यासोबतच्या आर्थिक व्यवहारातून ही घटना घडली असल्याचे समजते. याबाबत रात्री उशिरापर्यंत एमआयडीसी पोलीस ठाण्यात गुन्हा दाखल झाला नव्हता. गलांडे यांनी जबाब दिल्यानंतर गुन्हा दाखल केला जाणार असल्याचे सहायक निरीक्षक सानप यांनी सांगितले.