<p><strong>अहमदनगर |प्रतिनिधी| Ahmednagar</strong></p><p>ब्रिटनमध्ये नव्या कोरोनाचा कहर सुरू झाल्यानंतर नगरमध्ये काल गुरूवारी 13 तर आज शुक्रवारी आणखी 26 जण आल्याचे आढळून आले आहे. नगरमध्ये एकूण 39 जण ब्रिटनमधून आल्याने नगरकरांच्या चिंतेत भर पडली आहे</p>.<p>दरम्यान या सगळ्यांची आरटीपीसीआर टेस्ट केली जाणार असल्याचे सूत्रांकडून समजते. परदेशातून आलेले सर्वाधिक 30 जण हे नगर शहराच्या विविध भागात पोहचले आहेत. </p><p>गुरूवारी नगरमध्ये 13 जण ब्रिटनमधून आल्याची माहिती जिल्हा प्रशासनाला मिळाली. त्यात नगरमध्ये 11 तर श्रीगोंदा व संगमनेरचा प्रत्येकी एक प्रवासी होता. आज शुक्रवारी जिल्हा प्रशासनाला पुन्हा नव्याने 26 जणांची नावे मिळाली आहेत. हे सगळे प्रवासी ब्रिटनहून आल्याचे समजते. त्यातील सर्वाधिक 20 प्रवासी हे नगर शहरातील असून जामखेड, श्रीरामपूर, श्रीगोंदा, संगमनेरमधील प्रत्येकी एक तर पारनेरमध्ये दोघांचा समावेश आहे. </p><p>नगर शहरातील शिवाजीनगर, कराचीवालानगर, पाईपलाईन रोड, सावेडीतील निरंजन कॉलनी आणि अमित बँक कॉलनी तसेच टीव्ही सेंटर भागात हे प्रवासी विखुरले गेले असल्याची माहिती सूत्रांनी दिली.</p>.<p><strong>इंग्लडहून श्रीरामपुरात आलेला प्रवाशाचा करोना अहवाल निगेटीव्ह</strong></p><p><em>श्रीरामपूर शहरातील एक तरूण 7 तारखेला इंग्लडहून दिल्लीला आला होता. तेथे विमानतळावर त्याची करोना चाचणी करण्यात आली. त्यात त्याचा अहवाल निगेटीव्ह आला. त्यानंतर आदेशानुसार या तरूणास होम क्वारंटाईन करण्यात आल्याची माहिती तालुका वैद्यकीय अधिकारी डॉ. मोहन शिंदे यांनी दिली. दरम्यान, हा प्रवासी एका पुढार्याचा मुलगा असल्याचे सांगण्यात आले.</em></p>
