अभ्यासासाठी शिक्षक विद्यार्थ्यांच्या घरी

अहमदनगर |प्रतिनिधी| Ahmednagar

करोनामुळे यंदा शाळा अद्याप लॉकडाऊनच आहेत. त्यासाठी ऑनलाईन शिक्षणाचा पर्याय अवलंबला जात आहे. पण ज्या पालकांकडे स्मार्टफोन व ऑनलाईन शिक्षणासाठी लागणार्‍या सुविधा उपलब्ध नाहीत, अशा विद्यार्थ्यांचे शैक्षणिक नुकसान होते.

मनपाच्या केडगाव येथील ओंकारनगर प्राथमिक शाळेतील शिक्षक विद्यार्थ्यांना ऑनलाईन शिक्षण देत आहेत. पण काही पालकांकडे स्मार्टफोन उपलब्ध नाहीत. काही पालकांकडे नेट नाही. अशा विद्यार्थ्यांसाठी या शाळेचे मुख्याध्यापक भाऊसाहेब कबाडी, सहशिक्षक शिवराज वाघमारे, सहशिक्षिका वृषाली गावडे विद्यार्थ्यांच्या घरी जाऊन गटागटाने विद्यार्थ्यांचा अभ्यास घेत आहेत.

जे विद्यार्थी ऑनलाईन शिक्षणात आवश्यक सुविधेअभावी सहभागी होऊ शकत नाहीत. अशा विद्यार्थ्यांसाठी शिक्षकांनी छापील अभ्यास तयार केला आहे. हा छापील अभ्यास विद्यार्थ्यांना घरी जाऊन सर्व सामाजिक अंतराच्या नियमांचे पालन करून शिक्षक सोडवण्यास मदत करतात. शिक्षकांच्या या उपक्रमामुळे विद्यार्थ्यांना अभ्यासात खूप मदत होत आहे.

विद्यार्थ्यांना आठवड्याचा अभ्यास दिला जातो व पुढील आठवड्यात तो तपासून पुन्हा नवीन अभ्यास दिला जातो.या उपक्रमामुळे विद्यार्थ्यांना अभ्यासात येणार्‍या अडचणी दूर झाल्या आहेत.त्यामुळे विद्यार्थ्यांचा नियमितपणे अभ्यास सुरू आहे. तसेच शिक्षक विद्यार्थी व पालकांची करोनाबाबत जनजागृती करत आहेत.

ओंकारनगर शाळेतील शिक्षक राबवित असलेल्या या उपक्रमाचे मनपा शिक्षण विभागाचे प्रशासनाधिकारी सुभाष पवार, पर्यवेक्षक जुबेर पठाण, केंद्रसमन्वयक चंद्रशेखर साठे, विषयतज्ज्ञ अरुण पालवे यांनी कौतुक केले आहे.