कत्तलीसाठी जनावरे घेऊन जाणारा पिकअप पकडला

अहमदनगर |प्रतिनिधी| Ahmednagar

गावरान खिलार जातीच्या दोन आणि एक जर्शी गाय अशी जनावरे घेऊन कत्तल करण्यासाठी कत्तलखान्याकडे निघालेला पिकअप नगर तालुका पोलिसांनी वाळकी (ता. नगर) शिवारात पकडला आहे. रविवारी पहाटेच्या सुमारास पोलीस पथकाने ही कारवाई केली आहे.

याप्रकरणी दोघांवर पोलीस ठाण्यात गुन्हा दाखल करण्यात आला आहे. संतोष गंगाधर भालसिंग (वय 36 रा. वाळकी) व मुनाफ कुरेशी (पूर्ण नाव माहिती नाही, रा. झेंडीगेट) अशी गुन्हा दाखल झालेल्यांची नावे आहेत. वाळकी शिवारातून काही इसम पिकअप गाडीत गोवंशीय जनावरे घेऊन कत्तल करण्यासाठी कत्तलखान्याकडे जात असल्याची माहिती नगर तालुका पोलिसांना दिली होती.

ही माहिती मिळताच सहाय्यक फौजदार दिनकर घोरपडे, अंमलदार सोमनाथ वडणे, राहुल थोरात, संभाजी बोराडे, विक्रांत भालसिंग चालक विकास शिंदे यांच्या पथकाने वाळकी शिवारात संशयित पिकअप पकडला. त्यामध्ये दोन गावरान खिलार जातीच्या गायी व एक जर्शी गाय अशी जनावरे आढळून आली. पोलीस पथकाने 48 हजार रुपये किमतीची जनावरे व पाच लाख रुपये किमतीचे पिकअप वाहन जप्त केले आहे.