<p><strong>श्रीगोंदा |तालुक प्रतिनिधी| Shrigonda</strong></p><p> महाराष्ट्र शासनाच्या ग्रामविकास विभागाने सरपंच पदांची आरक्षणे निश्चित करून सदर सरपंचांचे आरक्षित पदांचे जिल्हानिहाय वाटप केलेले असून </p>.<p>अहमदनगर जिल्ह्यातील 14 तालुक्यांमध्ये एकूण 1218 सरपंचपदांपैकी 151 सरपंचपदे अनुसूचित जातीसाठी (75 व्यक्ती व 76 महिला) , 83 सरपंचपदे अनुसूचित जमातीसाठी (41 व्यक्ती व 42 महिला), 329 सरपंचपदे नागरिकांच्या मागास प्रवर्गासाठी (त्यात 164 व्यक्ती आणि 165 महिला), तर 655 सरपंचपदे खुल्या प्रवर्गासाठी (त्यात 327 व्यक्ती व 328 महिला) निश्चित करण्यात आली आहेत.</p><p>श्रीगोंदा तालुक्यातील एकूण 86 सरपंचपदे असून, त्यापैकी 12 अनुसूचित जातीसाठी (त्यात 6 व्यक्ती व 6 महिला), पाच सरपंचपदे अनुसूचित जमातीसाठी (त्यात 3 व्यक्ती व 2 महिला), तेवीस सरपंचपदे नागरिकांचा मागास प्रवर्ग (त्यात 12 व्यक्ती व 11 महिला), सेहचाळीस सरपंचपदे खुल्या प्रवर्गासाठी (त्यात 23 व्यक्ती व 23 महिला) राहणार आहेत.</p><p>86 पैकी 12 सरपंचपदे अनुसूचित जाती आणि 5 सरपंचपदे अनुसूचित जमातीच्या लोकसंख्येचा विचार करून निश्चित केली जातील.</p><p>86 सरपंचपदांच्या 27% म्हणजेच 23 पदे चक्रानुक्रमे नागरिकांचा मागास प्रवर्ग यासाठी ठरविली जातील व त्यामध्ये 11 महिलांची आरक्षणे सोडत पद्धतीने निश्चित केली जातील. 46 सरपंचपदे चक्रानुक्रमे खुल्या प्रवर्गासाठी ठरविली जातील आणि त्यात 23 सरपंचपदे सोडत पद्धतीने महिलांना दिली जातील.</p>
