<p><strong>करंजी |वार्ताहर| Karanji</strong></p><p>मी हाडाचा पैलवान असल्याने मला कुस्तीच्या खेळातील अनेक डावपेच माहित आहेत. त्यामुळे राजकीय पटलावर विरोधकांनी कितीही प्रयत्न केले </p>.<p>तरी त्यांच्या डावात मी सापडणारा नाही. राजकीय डावपेचात माझा पुरता हातखंडा असल्याने विरोधकांचे स्वप्न धुळीस मिळवण्याचे काम केले आहे, अशा शब्दांत माजी मंत्री शिवाजीराव कर्डिले यांनी जिल्हा बँकेच्या निवडणूक निकालानंतर विरोधकांना सूचक इशारा दिला आहे.</p><p>जांबकौडगाव येथे शिवजयंतीनिमित्त आयोजित केलेल्या राज्यस्तरीय कुस्ती मैदानातील शेवटची 1 लाख रुपयाची कुस्ती माजी मंत्री शिवाजीराव कर्डिले यांच्याहस्ते लावण्यात आली. यावेळी उपस्थित पैलवानासह प्रेक्षकांसमोर ते बोलत होते. कर्डिले म्हणाले, जिल्हा बँकेमध्ये मी कधी राजकारण केले नाही. सातत्याने शेतकरी हिताचे निर्णय बँकेत घेण्याचा मी प्रयत्न केला. </p><p>बँकेची निवडणूक बिनविरोध होण्यासाठी प्रामाणिक प्रयत्न केले. माझ्या प्रयत्नांमुळेच बँकेत 17 संचालक बिनविरोध झाले, असे असताना मला मात्र निवडणुकीला सामोरे जाण्याची वेळ विरोधकांनी आणली असली तरी निवडणुकीच्या निकालाने नगर तालुक्यातील स्वाभिमानी जनतेने विरोधकांचे दात घशात घालण्याचे काम केले असून कुस्तीच्या डावाबरोबरच मी राजकारणातले देखील अनेक डावपेच अवगत केले आहेत.</p><p>विरोधकांच्या डावात येण्याइतका मी सोपा गडी नाही. बँकेची निवडणूक मला लढवण्यास भाग पाडणार्यांना चार दिवस क्षणीक आनंद मिळाला असला तरी पुढचे दिवस आपलेच असून सर्व निर्णय शेतकरी हिताचे होतील, अशी ग्वाही देत नगर तालुका पैलवानांची खान असून कौडगाव येथे स्व. लक्ष्मणराव खर्से यांनी कौडगावात पैलवानांची फौज उभी केली. </p><p>त्यांची परंपरा पुढे नेण्याचे काम बाबा पाटील खर्से, उत्तर महाराष्ट्र केसरी पै. धनंजय खर्से, पै. रणजीत खर्से हे करत आहेत. कुस्त्यांचे मैदान भरून ग्रामीण भागातील कुस्तीपटूंना व्यासपीठ उपलब्ध करून देण्याचे काम उत्तर महाराष्ट्र केसरी युवराज करंजुले व धनंजय खर्से यांनी केले आहे.</p><p>क्रिकेटच्या खेळाप्रमाणेच कुस्तीच्या खेळाला देखील जागतिक पातळीवर सर्वोत्तम दर्जा मिळावा. पैलवान घडविण्यासाठी मोठे शारीरिक परिश्रम घ्यावे लागतात. गोरगरिबांची मुलं कुस्तीच्या आखाड्यात उतरून आपलं जीवन घडविण्याचा प्रयत्न करतात त्यामुळे या मुलांना प्रत्येक गावाने सन्मानाची वागणूक दिली पाहिजे, असे आवाहन कर्डिले यांनी याप्रसंगी केले.</p><p>पै. सुभाष गाढवे व पै. योगेश पवार यांची 1 लाख रुपयाची कुस्ती बरोबरीत सुटली असली तरी मनोज फुले, सुरेश पालवे, अक्षय पवार, मनोहर कर्डिले, मयुर जपे, आदेश रायकर, रणजीत खर्से, लौकीक चौगुले, विशाल आढाव ओंकार मुरकुटे यांच्या लढती मात्र लक्षवेधी ठरल्या.</p>
