शिर्डीत सोमवारपासून साईबाबांचा पुण्यतिथी उत्सव

शिर्डी |प्रतिनिधी| Shirdi

श्री साईबाबा संस्थानच्या वतीने सालाबादप्रमाणे या वर्षीही सोमवार दि. 23 ते गुरुवार दि. 26 ऑक्टोबर या कालावधीत श्री साईबाबांचा 105 वा पुण्यतिथी उत्सव साजरा करण्यात येणार असून साईभक्तांची होणारी संभाव्य गर्दी लक्षात घेवून 24 ऑक्टोबर 2023 रोजी समाधी मंदिर दर्शनासाठी रात्रभर उघडे राहणार आहे. साईभक्तांनी या उत्सवात मोठ्या संख्येने सहभागी होवून उत्सवाची शोभा वाढवावी, असे आवाहनही संस्थानचे मुख्य कार्यकारी अधिकारी पी शिवा शंकर यांनी केले आहे.

पी शिवा शंकर म्हणाले, साईबाबांनी 104 वर्षांपुर्वी दसर्‍याच्या दिवशी दुपारी 2.35 वाजता शिर्डी येथे आपला देह ठेवला. त्या दिवशी मंगळवार होता. 1919 साली तिथीप्रमाणे बाबांची पहिली पुण्यतिथी साजरी करण्यात आली. त्यानंतर आजतागायत हा पुण्यतिथी उत्सव नव्या उत्साहात साजरा केला जात आहे. ज्यामुळे विजयादशमी म्हणजे श्री साईबाबांची पुण्यतिथी अशी एक नवी ओळख या सणाची निर्माण झाली आहे. देशभरातील व जगातील साईभक्त हा उत्सव साजरा करतात. त्यानुसार पुण्यतिथी उत्सव साजरा करण्यात येत असून उत्सवानिमित्त चार दिवस विविध कार्यक्रमाचे आयोजन करण्यात आलेले आहे.

उत्सवाच्या प्रथम दिवशी सोमवार दि. 23 रोजी पहाटे 5.15 वाजता श्रींची काकड आरती, 5.45 वाजता श्रींच्या फोटोची व पोथीची मिरवणूक, 6 वाजता व्दारकामाईत श्री साईसच्चरिताचे अखंड पारायण, 6.20 वाजता श्रींचे मंगलस्नान, 7 वाजता श्रींची पाद्यपुजा, दुपारी 12.30 वाजता माध्यान्ह आरती, दुपारी कीर्तन, सायंकाळी 6 वाजता धुपारती होईल. रात्रौ 7.30 व रात्रौ 9.30 वा. निमंत्रित कलाकार कार्यक्रम, रात्रौ 9.15 वाजता गावातून पालखीची मिरवणूक होणार आहे. रात्रौ 10 वाजता श्रींची शेजारती (पालखी मिरवणूक परत आल्यानंतर) होणार आहे. उत्सवाचा हा पहिला दिवस असल्यामुळे अखंड पारायणासाठी व्दारकामाई मंदिर रात्रभर उघडे राहील.

उत्सवाचे पारायणात अध्याय वाचनासाठी भाग घेऊ इच्छिणारे साईभक्तांनी रविवार, दि. 22 ऑक्टोबर रोजी दुपारी 1 ते 5.15 वाजेपर्यंत समाधी मंदिरासमोरील स्टेजवर आपली नावे नोंदवावीत. नांव नोंदणी केलेल्या साईभक्तांची त्याच दिवशी त्याच ठिकाणी 5.20 वाजता उपस्थित लहान मुलांच्या हाताने चिठ्ठ्या काढुन ड्रॉ पध्दतीने अध्याय वाचनासाठी निवड केली जाईल.

मंगळवार हा श्रींचे पुण्यतिथी उत्सवाचा मुख्य दिवस आहे. या दिवशी पहाटे 5.15 वाजता श्रींची काकड आरती, 5.45 वाजता अखंड पारायण समाप्ती, श्रींच्या फोटो व पोथीची मिरवणूक, 6.20 वाजता श्रींचे मंगलस्नान, 7 वाजता श्रींची पाद्यपूजा, 9 वाजता भिक्षा झोळी कार्यक्रम, 10 वाजता कीर्तन तसेच सकाळी 10.30 वाजता श्रींचे समाधी समोर आराधना विधीचा कार्यक्रम होईल. दुपारी 12.30 वाजता माध्यान्ह आरती तर सायंकाळी 5 वाजता खंडोबा मंदिर येथे सिमोल्लंघन, 6 वाजता धुपारती होईल. रात्रौ 7.30 ते 09.00 व रात्रौ 09.30 ते 10.00 यावेळेत निमंत्रित कलाकार कार्यक्रम होणार असून रात्रौ 9.15 वाजता गावातून श्रींच्या रथाची मिरवणूक होणार आहे. रात्रौ 10 ते पहाटे 5 श्रींच्या समोर कलाकार हजेरी कार्यक्रम होईल. उत्सवाच्या मुख्य दिवशी समाधी मंदिर साईभक्तांना दर्शनासाठी रात्रभर उघडे असल्यामुळे रात्री होणारी शेजारती व 25 ऑक्टोबर रोजी पहाटेची काकड आरती होणार नाही. ज्या साईभक्तांना भिक्षाझोळी कार्यक्रमात भाग घ्यावयाचा असेल त्यांनी आपली नावे समाधी मंदिरासमोरील स्टेजवर 23 रोजी नोंदवावीत. नांव नोंदणी केलेल्या साईभक्तांची त्याच दिवशी ड्रॉ पध्दतीने 20 चिठ्ठ्या काढण्यात येतील व भाग्यवान भिक्षा झोळीधारकांची नावे जाहीर केली जातील.

उत्सवाच्या तृतीय दिवशी बुधवारी रोजी पहाटे 5.05 श्रींचे मंगलस्नान, 7 वाजता श्रींची पाद्यपुजा, दुपारी 12.10 वाजता माध्यान्ह आरती, दुपारी 4 एकादशी कीर्तन, सायंकाळी 6 धुपारती, 7.30 निमंत्रित कलाकार कार्यक्रम होईल. रात्रौ 10.00 वाजता श्रींची शेजारती होणार आहे. उत्सवाच्या सांगता दिवशी गुरुवार 26 रोजी पहाटे 5.15 वाजता काकड आरती, 5.50 वाजता मंगलस्नान, 6.50 वाजता पाद्यपूजा, 7.00 वाजता गुरुस्थान मंदिरात रुद्राभिषेक पूजा होईल. सकाळी 10 वाजता गोपाळकाला कीर्तन व दहीहंडी होणार असून दुपारी 12.10 वाजेच्या दरम्यान श्रींची माध्यान्ह आरती, सायंकाळी 6 वाजता धुपारती, रात्रौ 7.30 निमंत्रित कलाकार कार्यक्रम, रात्रौ 9.15 वाजता श्रींची गुरुवार नित्याची पालखी मिरवणूक होऊन रात्रौ 10.00 वाजता श्रींची शेजारती होणार असल्याचे पी शिवा शंकर यांनी सांगितले. हा उत्सव यशस्वीरित्या पार पाडण्यासाठी उपमुख्य कार्यकारी अधिकारी तुकाराम हुलवळे, सर्व प्रशासकीय अधिकारी, सर्व विभाग प्रमुख व सर्व कर्मचारी प्रयत्नशिल आहेत.