<p><strong>सोनई |वार्ताहर| Sonai</strong></p><p>शनिदर्शनासाठी आलेल्या भाविकांचे वाहन अडवून त्यांना ठराविक दुकानावरूनच पुजासाहित्य घेण्याची सक्ती करत दमदाटी करत असलेल्या </p>.<p>दोन कमिशन एजंटांवर (लटकू) शनिशिंगणापूर पोलिसांनी ताब्यात घेऊन कारवाई केली.</p><p>भाविकांच्या वाढत्या तक्रारीनंतर सहायक पोलीस निरीक्षक सचिन बागुल यांनी सोनई व घोडेगाव रस्त्यावर गस्त घालत लटकूंना सळो की पळो केले. वैष्णवी हॉटेलसमोर व कुर्हाट पार्किंगसमोर भाविकांची अडवणूक करत असलेल्या सुमीत बबन शिंदे (वय 20) व रमेश सुखदेव फुलारे (वय 25) दोघेही रा. सोनई यांना अटक करण्यात आली आहे.</p><p>सहायक पोलीस निरीक्षक सचिन बागुल यांचेसह हवालदार अनिल देवकर, बापू फुलमाळी, मोहन बडे, डी. व्ही. झरेकर व पथकाने रस्त्यावर व गावात गस्त घालत कारवाईचा धडाका लावला. या कारवाईने काल दिवसभर भाविकांची अडवणूक कमी प्रमाणात झाली.</p>.<div><blockquote>शिंगणापूर ग्राम-पंचायतीच्या बंद असलेल्या प्रवासी करनाक्यावर लटकूंनी ताबा घेतला असून हा प्रकार पोलिसांनी तातडीने बंद करावा,अशी मागणी भाविक व ग्रामस्थांनी केली आहे.</blockquote><span class="attribution"></span></div>
