शेवगावच्या 105 आदिवासी विद्यार्थ्यांनी मध्यरात्री धरली नाशिकची वाट

शेवगाव |शहर प्रतिनिधी| Shevgav

प्रवरा मेडीकल ट्रस्ट संचलित येथील शेवगाव इंग्लिश मेडीयम स्कुल अँण्ड जुनिअर काँलजमधील अकरावीच्या 105 आदिवासी विदयार्थ्यांनी शुक्रवारी ( दि .24 ) रात्री उशीरा वस्तीगृह सोडून पायी नाशिक येथील आदिवासी आयुक्त कार्यालयास जाण्याची वाट धरली. यामुळे एकच खळबळ उडाली. महाविदयालयात या विद्यार्थ्यांची गैरसोय होत असून शासनाच्या निकषाप्रमाणे सोयी सुविधा दिल्या जात नसल्याच्या तक्रारीवरून या विदयार्थ्यांचा उद्रेक झाल्याची भूमिका या विद्यार्थ्यांनी मांडली.

रात्री उशीरा पोलीस, आदिवासी प्रकल्प विभागाचे अधिकारी व सामाजिक कार्यकर्त्यांनी या विदयार्थ्यांची समजूत काढली. व पहाटे विदयार्थी पुन्हा महाविदयालयात परत आणले. आदिवासी विदयार्थ्यांना इंग्रजी माध्यमाचे शिक्षण मिळावे म्हणून राज्यातून अडीच हजार आदिवासी विदयार्थी निवडून त्यांना वेगवेगळ्या शाळेत पाठवले जाते. शेवगाव येथे नाशिक, नंदुरबार, धुळे, जळगाव या भागातील सुमारे 125 विदयार्थी व 25 विदयार्थीनी अशी 150 विदयार्थी येथे राहत आहेत.

या विद्यार्थ्यांनी पिण्याच्या पाण्याची योग्य सुविधा नसल्याने बाथरुमधील पाणी प्यावे लागते, पुरेशा स्नानगृहाची व शौचालयांची सोय नाही, वस्तीगृहाऐवजी आयुर्वेदिक महाविदयालयाच्या खोल्यामध्ये दाटीने ठेवल्याची, तसेच आदिवासी विदयार्थ्यांना स्वतंत्र क्लासरुम मध्ये बसवले जाते. काही शिक्षकांकडून जातीवाचक उल्लेख केला जातो. आशा तक्रारी या विदयार्थ्यांनी केल्या.

याबाबत आदिवासी प्रकल्प विभागाच्या अधिकार्‍यांकडे वारंवार तक्रारी करुनही दखल घेतली जात नव्हती. म्हणून विदयार्थ्यांनी काल शुक्रवारी ( दि .24 ) रात्री अचानाक नाशिक आदिवासी आयुक्तांकडे जाण्यासाठी पायी मोर्चा काढला. ही माहिती कळताच पोलीस व वंचित बहुजन आघाडीचे प्रदेश उपाध्यक्ष प्रा. किसन चव्हाण यांनी पाठलाग करून नेवासा रस्त्यावर या विदयार्थ्यांना अडवून जवळच एका मंगल कार्यालयात थांबविले. आणि आदिवासी प्रकल्प विभागाच्या अधिकार्‍यांशी भ्रमनध्वनीवरुन संपर्क करुन त्यांना येथे येण्यास भाग पाडले.

दरम्यान आज सकाळी हे विदयार्थी प्रा. किसन चव्हाण, सहाय्यक पोलीस निरीक्षक विश्वास पावरा, प्रवरा मेडीकल ट्रस्टचे पंजाबराव आहेर, नकुल तांबे, काँलेजचे प्राचार्य एस.आर. प्रधान, प्राचार्य डॉ. बी.टी. शिंदे, प्राचार्य डॉ.ओंकार रसाळ, संचालिका श्रीमती परांजपे आदिंची एकत्रीत बैठक झाली. विदयार्थ्यांनी त्यांच्या समस्या महाविदयालयीन प्रशासनासमोर मांडल्या. या सर्व समस्यांचे निराकरण आठ दिवसात झाले नाही तर या विदयार्थ्यांसह नाशिक आयुक्त कार्यालयाकडे जावून जाब विचारण्यात येईल. तसेच संस्थेची मान्यता रद्द करण्याची मागणी करण्यात येईल असे प्रा. चव्हाण म्हणाले.