<p><strong>शेवगाव |तालुका प्रतिनिधी| Shevgav</strong></p><p>शेवगाव नगरपरिषदेचे प्रशासक तथा प्रांताधिकारी देवदत्त केकाण यांच्या मार्गदर्शनाखाली नगरपरिषदेच्या हद्दीतील थकीत मालमत्ता कर </p>.<p>धारकांची मालमत्ता सीलबंद करण्याची कारवाई रविवारी (दि. 14) रोजी करण्यात आली. यात मालमत्ता कर थकीत असणार्यांत हॉटेल संकेत, हॉटेल गारवा व आनंद जिनिंग मिल आदींच्या मालमत्ता सिलबंद करून धडक कारवाई करण्यात आल्याची माहिती नगरपरिषदेचे मुख्य कार्यकारी अधिकारी अंबादास गर्कळ यांनी दिली.</p><p>प्रांताधिकारी केकाण यांच्या मार्गदर्शनाखाली थकीत मालमत्ता कर धारकांविरोधात ही कारवाई दररोज सुरू राहणार असल्याचे श्री. गर्कळ यांनी सांगितले. शेवगाव नगरपरिषद पदाधिकारी यांची पाच वर्षांची मुदत संपल्याने जिल्हाधिकारी डॉ.राजेंद्र भोसले यांच्या आदेशानुसार प्रांताधिकारी केकाण यांची प्रशासक म्हणून नेमणूक करण्यात आली आहे. </p><p>प्रशासक केकाण यांनी नगरपरिषदेतील सर्व विभाग प्रमुखांची बैठक घेऊन कामकाजाचा आढावा घेतला होता. त्यानंतर थकित मालमत्ता कर धारकांवर कारवाईचे संकेत दिले होते. तसेच अनधिकृत नळजोड अधिकृत करून न घेतल्यास फौजदारी गुन्हे दाखल करण्याचे तसेच थकीत मालमत्ता धारकांची यादी चौकात लावण्यात येईल, असे जाहीर केलेले आहे.</p><p>नगरपरिषदेच्या हद्दीतील हॉटेल संकेतकडे 7 लाख 72 हजार सहा रुपये, हॉटेल गारवाकडे 59 हजार 411 रुपये तसेच आनंद कॉटेक्सकडे 3 लाख 88 हजार 789 रूपये मालमत्ता कर थकबाकी होती. नगरपरिषदेच्या पथकाने प्रशासक तथा प्रांताधिकारी केकाण यांच्या मार्गदर्शनाखाली हॉटेल संकेत, हॉटेल गारवा व आनंद कॉटेक्स (जिनिंग मिल) या तिनही मालमत्ता सीलबंद करण्याची कारवाई केली. </p><p>प्रांताधिकारी केकाण यांच्या मार्गदर्शनाखाली मुख्याधिकारी अंबादास गर्कळ, कर अधीक्षक डी. सी. साळवे, कर निरीक्षक डी. बी. कोल्हे, नगररचना विभागाचे खान, वसुली विभागाचे अशोक सुपारे, श्रीकृष्ण ढाकणे, संजय साखरे, गोपी छजलानी, शेकडे, मुरदारे, अतिक्रमण विभागाचे लांडे आदींनी ही धडक कारवाई केली.</p><p>थकीत मालमत्ता धारकांची कर वसुली मोहीम सुरू करून नगरपरिषदेच्या उत्पन्नात भर पडेल. तसेच त्यामुळे नगरपरिषदेच्या कर्मचार्यांच्या वेतनाचा प्रश्न सुटू शकेल. तसेच शहराच्या विकास कामांना चालना मिळेल. या उद्देशाने प्रशासक तथा प्रांताधिकारी यांनी कारवाईची मोहीम हाती घेतली आहे. नागरिकांनी मालमत्ता कर थकबाकी भरून सहकार्य करावे, असे आवाहन मुख्याधीकारी गर्कळ यांनी केले आहे.</p>
