<p>अहमदनगर (प्रतिनिधी)</p><p>तालुक्यातील खोसपुरी शिवारातील ‘हॉटेल तंदुरी चाय लिलियम पार्क’च्या मालकाने वीज मीटरमध्ये फेरफार</p>.<p>करून 6 लाख 90 हजार 100 रुपयांची 37 हजार 180 युनिट वीज चोरी केल्याचा प्रकार उघडकीस आला आहे. </p>.<p>याप्रकरणी एमआयडीसी पोलीस ठाण्यात भारत विठ्ठल शेटे, संदीप बबन जरे या दोघांविरुद्ध वीज चोरीचा गुन्हा दाखल केला आहे. महावितरणचे अतिरिक्त कार्यकारी अभियंता प्रदीप सावंत यांनी फिर्याद दिली आहे. </p>.<p>अतिरिक्त कार्यकारी अभियंता सावंत, सहायक अभियंता गफ्फार मेहताब शेख, कनिष्ठ अभियंता आशिष नावकार, सहायक सुरक्षा अधिकारी शशीकुमार तांबे, तंत्रज्ञ यशवंत वेदपाठक या पथकाने हॉटेल तंदुरी चाय लिलियम पार्क मधील वीज मीटरची 17 फेब्रुवारीला तपासणी केली. वीज मीटरची तपासणी केली असताना ते हाताळलेले दिसले. त्यानंतर पथकाने वीज मीटरची बारकाईने तपासणी केली. मीटरच्या उजव्या बाजूला छोटे छिद्र दिसले. त्यानंतर डिस्प्ले आणि टोंगरटेस्ट वरील करंटमध्ये तफावत दिसली. पथकाने अधिक तपासणीसाठी वीज मीटर ताब्यात घेतले. या सर्व कार्यवाहीचे चित्रीकरण पथकाकडून करण्यात आले. तसा पंचनामा करून संदीप जरे याची स्वाक्षरी घेतली. अहमदनगर येथील कक्ष चाचणीत मीटर तापसले. येथे मीटरची बारकाईने तपासणी केल्यावर मीटरमधील सीटीच्या आर-फेज आणि वाय-फेज ची लाल रंगाची वायर तोडलेली दिसली. वीज वापराची नोंद वीज मीटरमध्ये कमी व्हावी, यासाठी ही कायमस्वरूपी व्यवस्था करून वीज चोरी केल्याचे निदर्शनास आले. या व्यवसायिकाने सुमारे 24 महिन्याच्या कालावधीत महावितरण कंपनीचे 37 हजार 180 युनिटची वीज चोरी केली. या विजेचा अधिभार किंमतीत 6 लाख 90 हजार 100 रुपये इतका आहे. यानुसार महावितरणचे अधिकारी यांनी एमआयडीसी पोलिसांकडे तक्रार दिली आहे. एमआयडीसी पोलिसांनी याप्रकरणी संदीप जरे आणि भारत शेटे या दोघांविरुद्ध गुन्हा नोंदविला आहे.</p>
