<p><strong>संगमनेर |शहर प्रतिनिधी| Sangmner</strong></p><p>संगमनेर शहर व तालुक्यात वाळूतस्करी पुन्हा जोरदार सुरू झाली. या व्यवसायावर संबंधित विभागाचे पूर्णपणे दुर्लक्ष होताना दिसत आहे. </p>.<p>वाळू तस्करांची अनेक वाहने दंड न भरताच परस्पर सोडून दिली जात असल्याने नागरिकांमधून संताप व्यक्त केला जात आहे.</p><p>प्रवरा, मुळा, आढळा, म्हाळुंगी नदीपात्रातून मोठ्या प्रमाणात वाळू वाहतूक सुरू आहे. शहरालगत असणार्या प्रवरा व म्हाळुंगी नदीपात्रातून सुमारे 10 ते 12 ट्रॅक्टर, 30 ते 35 रिक्षा, जीपच्या सहाय्याने वाळूची तस्करी जोरदार सुरू आहे. असे असतानाही संबंधित अधिकारी याकडे कानाडोळा करताना दिसत आहेत. </p><p>संगमनेर तालुक्यातील अनेक ग्रामपंचायतींच्या निवडणुका लागल्या असल्याने महसूल अधिकारी या कामात व्यस्त आहेत. त्यामुळे वाळूतस्करीकडे त्यांचे दुर्लक्ष होताना दिसत आहे. परंतु महसूलचे काही कर्मचारी व अधिकारी वाळूतस्करांना पाठीशी घालत असल्याचे चित्र आहे. दोन दिवसांपूर्वी जवळेकडलग येथून वाळूची वाहतूक करणारा ट्रॅक्टर पकडला होता. </p><p>मात्र ह्या ट्रॅक्टरवर कोणतीही कारवाई न करता परस्पर सोडून देण्यात आला. हा ट्रॅक्टर सोडणार्यावर तहसीलदारांनी कारवाई का केली नाही? असा सवाल उपस्थित केला जात आहे. सोडलेला ट्रॅक्टर वेगळ्या रंगाचा होता आणि अधिकार्यांनी पाठविलेल्या ट्रॅक्टरचा फोटो वेगळ्या रंगाचा होता. तहसीलदारांकडूनच कारवाई होत नसेल तर ही वाळूतस्करी कशी थांबणार? असा प्रश्न उपस्थित केला जात आहे.</p><p>गेल्या काही दिवसांपूर्वी तालुक्यातील मंगळापूर येथील प्रवरानदीपात्रातून वाळूची वाहतूक करताना बैलगाड्या पकडल्या होत्या. ही कारवाई पहाटेच्या सुमारास करण्यात आली. त्यानंतर सकाळी कारवाई केलेल्या बैलगाड्या वाळूतस्करांच्या घरी पुन्हा कशा काय आल्या. याचा उलगडा सर्वसामान्य नागरिकांना होताना दिसत नाही.</p>
