साईबाबांच्या झोळीत 13 महिन्यांत 398 कोटींचे दान

शिर्डी |प्रतिनिधी| Shirdi

देशातील नंबरच दोनचे श्रीमंत देवस्थान असलेल्या साईबाबा संस्थानच्या दानपेटीत 13 महिन्यांत 398 कोटींपेक्षा अधिक विक्रमी दान जमा झाले असून या दरम्यान 1 कोटी 50 लाखांहून अधिक साईभक्तांनी साईबाबा समाधीचे दर्शन घेतले, अशी माहिती संस्थानच्या मुख्य कार्यकारी अधिकारी भाग्यश्री बानायत यांनी दिली.

करोनाच्या काळानंतर 7 ऑक्टोबर 2021 ते नोव्हेंबर 2022 पर्यंत साईबाबांच्या दानपेटीत साई भक्तांनी भरभरून दान टाकले. या 13 महिन्यांत साईंच्या झोळीत भक्तांनी यावर्षी विक्रमी दान दिल्याची नोंद झाली आहे. भक्तांनी दिलेल्या दानात दक्षिणा पेटीत 168 कोटी रक्कम, देणगी स्वरूपात 77 कोटी, ऑनलाईन देणगी 73 कोटी, चेक व डी.डी देणगी 19 कोटी, क्रेडिट व डेबिट कार्ड देणगी 42 कोटी, मनीऑर्डर देणगी 2 कोटी, सोने व चांदी देणगी वगळता 234 कोटी पेक्षा जास्त देणगी स्वरूपात दान साईभक्तांनी बाबांच्या झोळीत टाकले आहे .

सर्व धर्म समभावाची शिकवण देणार्‍या साईबाबांच्या दानपेटीमध्ये दिवसेंदिवस वाढ होताना दिसत आहे. करोनाच्या पार्श्वभूमीवर एक वर्षापेक्षा जास्त कालावधीसाठी साई मंदिर बंद होते. कोविडचा प्रादूर्भाव मागच्या वर्षी कमी झाल्यानंतर साई मंदिर भाविकांना दर्शनासाठी खुले झाले तेव्हापासून शिर्डीत बाबांच्या दर्शनाकरिता विक्रमी गर्दी होऊ लागली. शिर्डी देशातील नंबर दोनचे श्रीमंत देवस्थान म्हणून ओळखले जाते. या ठिकाणी रेल्वे व विमान सेवा सुरू झाल्याने बाबांचे दर्शन घेण्याकरिता भक्तांना शिर्डी येथे येण्याकरिता तात्काळ व्यवस्था उपलब्ध झाल्यामुळे काकडी विमानतळ येथे दररोज शेकडो भाविक विदेशातून येतात तसेच विविध राज्यातून येणार्‍या साईभक्तांची संख्या दैनंदिन लाखापेक्षा जास्त आहे.

साईबाबा संस्थाने भाविकांना सुलभ दर्शन करता यावे म्हणून 109 कोटी खर्चाचे नवीन दर्शन रांग उपलब्ध केली आहे. या ठिकाणी एकाच वेळी 10 हजार साईभक्त बसू शकतील अशी वातानुकूलित हॉलची व्यवस्था केली आहे. ही नवीन दर्शन रांग व्यवस्था नवीन वर्षात सुरू होणार असून भक्तांना या व्यवस्थेमुळे अनेक तास रांगेत उभे राहावे लागणार नाही. दर्शन रांगेत व्यवस्थित बरोबरच संस्थांने 218 कोटी खर्चाचे एज्युकेशनल कॉम्प्लेक्स उभारण्याचे काम हाती घेतली असून ते पुढील वर्षी चालू होणार आहे. भक्तांना शिर्डीत साई दर्शन घेण्याकरिता सुलभ व्यवस्था व्हावी याकरिता संस्थांनी वेगवेगळे उपक्रम हाती घेतले असून लवकरच ते भक्तांच्या सेवेसाठी सुरू होणार असल्याचे मुख्य कार्यकारी अधिकारी बानायत यांनी सांगितले.