<p><strong>संगमनेर (प्रतिनिधी)-</strong></p><p>स्वातंत्र्य सेनानी, सहकार महर्षी भाऊसाहेब थोरात व कृषी औद्योगिक क्रांतीचे प्रणेते डॉ. अण्णासाहेब शिंदे यांच्या जयंती महोत्सवानिमित्त स्मृती पुरस्कार जाहीर करण्यात आले. </p>.<p>सहकार, समाजसेवा, पर्यावरण, पत्रकारिता या क्षेत्रात उल्लेखनिय कार्य केल्याबद्दल थोरात स्मृती पुरस्कार ज्येष्ठ पत्रकार संजय आवटे यांना, कृषी, शिक्षण, साहित्य, व संशोधन या क्षेत्रात उल्लेखनिय कार्य केल्याबद्दल डॉ. अण्णासाहेब शिंदे स्मृती पुरस्कार ग्लोबल टिचर पुरस्कार विजेते रणजितसिंह डिसले गुरुजी यांना, तसेच आदर्श सहकार व सामाजिक कार्यकर्ता पुरस्कार हा थोरात कारखान्याचे माजी चेअरमन अॅड. माधवराव कानवडे यांना देऊन गौरविण्यात येणार असल्याची माहिती समितीचे निमंत्रक आ. डॉ. सुधीर तांबे व बाजीराव पाटील खेमनर यांनी दिली.</p><p>जयंती महोत्सवानिमित्त या पुरस्कारांचे वितरण बुधवार दि. 13 जानेवारी रोजी दुपारी 12.30 वाजता मालपाणी लॉन्स येथे छत्तीसगडचे मुख्यमंत्री भूपेश बघेल तसेच राष्ट्रवादी काँग्रेसचे प्रदेशाध्यक्ष व जलसंपदा मंत्री जयंत पाटील यांच्या उपस्थितीत आणि काँग्रेसचे प्रदेशाध्यक्ष व महसूलमंत्री बाळासाहेब थोरात यांच्या अध्यक्षतेखाली होणार आहे.</p><p>या पुरस्कारांची निवड उल्हास लाटकर, प्रा. बाबा खरात, प्राचार्य केशवराव जाधव, विजय अण्णा बोर्हाडे, उत्कर्षाताई रुपवते, डॉ. राजीव शिंदे यांनी केली आहे.</p>
