<p><strong>पुणतांबा |वार्ताहर| Puntamba</strong></p><p>गावात व परिसरात वाढत चाललेल्या करोनाच्या संसर्गावर नियत्रंण करण्यासाठी पुणतांबा येथील ग्रामपंचायत प्रशासन व करोना समिती सतर्क झाली आहे.</p>.<p>करोनाचा संसर्ग वाढल्याचे वृत दैनिक सार्वमतमध्ये प्रसिद्ध होताच येथील करोना समितीचे अध्यक्ष डॉ. धनजंय धनवटे यांच्या अध्यक्षतेखाली बैठक संपन्न झाली. त्यात पुणतांबा येथील व्यावसायिक दुकाने सकाळी 8 ते 5 वाजेपर्यंत सुरु ठेवण्याच्या निर्णय झाला. त्याचबरोबर करोनाच्या नियमाचे काटेकोरपणे पालन करण्याचे व नियमाचे उल्लंघन करणारावर दंडात्मक कारवाई करण्याचे ठरविण्यात आले. </p><p>काल सकाळी 11 वाजता राहात्याच्या पोलीस अधिकार्यांनी पुणतांबा येथे येऊन मास्क न घालता फिरणार्यांवर दंडात्मक कारवाई केली. तसेच येथील सामाजिक कार्यकर्ते प्रताप वहाडणे यांनी हातात फलक घेऊन करोनाबाबत ग्रामस्थांमध्ये जनजागृती अभियान सुरु केले आहे. त्याचबरोबर येथील ग्रामीण रुग्णालयातही वैद्यकीय अधिकारी व त्यांचा स्टाफ करोनाचा संसर्ग वाढू नये म्हणून सक्रिय झाले आहेत.</p>
