<p><strong>सुपा |वार्ताहर| Supa</strong></p><p>निघोज महसूल मंडळातील वडगाव गुंड येथील सुपात्या डोंगराला काही समाजकंटकांनी बुधवारी (दि. 25) रात्री आग लावली. </p>.<p>यावर्षीच्या पावसाळ्यात येथील डोंगरावर भैरवनाथ मंदिर ग्रामविकास ट्रस्ट, वडगाव ग्रामविकास प्रतिष्ठाण व लोकजागृती सामाजिक संस्था यांनी सुमारे 1700 विविध जातीच्या वृक्षांची लागवड केली होती.</p><p>400 विविध जातींच्या औषधी वनस्पतींच्या प्रजाती आहेत. तर काही दुर्मीळ जातीचे वृक्षसंवर्धन येथे केलेले आहे. यातील सुमारे 1500 रोपांना संरक्षक जाळीचे कुंपण बसवून ठिबक सिंचन करण्यात आले आहे. पाण्याच्या सुविधेसाठी कुकडी कालव्याजवळील विहीरीवरून 10 हॉवर्स पॉवरचा पंप बसवून 10 लाख लिटर क्षमतेचे कागद बसवून शेततळेही तयार केलेले आहे. येथे सुमारे दोन किलोमिटरचा धावण्याचा ट्रॅक तयार केला आहे.</p><p>यासाठी आजपर्यंत सुमारे 18 लाख रुपये खर्च झाला आहे. येथील सुपाईमाता या देवस्थानाचे छोटेशे मंदिराचे कामही भाविकांनी चालू केले आहे. हा सर्व खर्च लोकसहभागातून ग्रामस्थ व पर्यावरणप्रेमींनी केला आहे.</p><p>या सर्व 24 एकरच्या सुपात्या पठारावर हा समाजहिताचा प्रकल्प उभा राहत असताना येथील काही समाजकंटना ते पाहवत नसल्याने त्यांनी या पुर्वी या प्रकल्पाला विरोध केला होता. त्याबाबत तक्रार प्रशासनाकडे गेल्या महिन्यात केलेली होती, परंतु त्यांनी त्याकडे दुर्लक्ष केल्यामुळे परवा रात्री येथे आग लावून हा प्रकल्प नष्ट करण्याचा प्रयत्न समाजकंटक करत आहेत.</p><p>त्यांचा शोध घेवून कारवाई करण्याची मागणी होत आहे. येथील डोंगरावर दररोज सकाळी व्यायाम, प्राणायाम करण्यासाठी दररोज 100 हून अधिक नागरीक येत आहेत. त्यांच्या श्रमदानातून एक चांगला प्रकल्प येथे आकार घेत असताना त्याला विरोध केला जात आहे.</p><p>येथील सर्व जमीनही महसूल विभागाच्या मालकीची असून तिच्यावर अतिक्रमण करू पाहणारे असा प्रकार करून त्रास देत असावेत, असा संशय आहे. शासनाच्या या जागेत असा पर्यावरण संवंर्धन प्रकल्पासाठी महसूलची परवानगी घेण्यात आलेली आहे.</p><p>दोन दिवसांपुर्वीच येथे उपजिल्हाधिकारी संदीप निचित यांनी भेट देवून प्रकल्पाची पाहणी केली व उपक्रमाचे कौतुक केले आहे. येथे एक आगळे-वेगळे औषधी वनस्पतींचे बन तयार करण्याचा मानस येथील कार्यकर्त्यांचा आहे. या चांगल्या कामाला कोणीही विरोध न करता सहकार्य करण्याचे आवाहन करण्यात आले आहे.</p>
