<p><strong>पारनेर |तालुका प्रतिनिधी| Parner</strong></p><p>तालुक्यातील सैनिक सहकारी बँकेकडून घेतलेल्या कर्जाची परत फेड करूनही कर्जदाराकडे ती रक्कम थकीत दाखवून </p>.<p>कर्जदाराने तारण ठेवलेल्या मालमत्तेचा बँकेला अधिकार नसतानाही बेकायदेशीररित्या हजर नसलेल्या व्यक्तींची खोटी सही करून फसवणूक केल्याप्रकरणी पुरुषोत्तम नारायण शहाणे (वय 54, धंदा व्यवसाय, रा. सुपा, ता. पारनेर) यांनी दिलेल्या फिर्यादीवरून शनिवारी (दि. 10) सैनिक बँकेचे चेअरमन, व्यवस्थापक, तत्कालीन मंडलाधिकारी, तलाठी यांसह 13 जणांवर पारनेर पोलीस स्टेशनमध्ये गुन्हा दाखल करण्यात आला आहे.</p><p>कर्जदाराने कर्जाची रक्कम भरली असतानाही ती रक्कम थकीत दाखवून कर्जदाराने तारण ठेवलेल्या जमिनीचा बेकायदेशीररित्या लिलाव केला याप्रकरणी आरोपी तलाठी करपे, मंडलाधिकारी दाते व बँक अधिकारी चेअरमन अर्जुन कारभारी चौधरी, मुख्य कार्यकारी अधिकारी संजय बाजीराव कोरडे, विद्यमान चेअरमन शिवाजी तुकाराम व्यवहारे, वसुली अधिकारी प्रवीण नाथा निघोट, व्यवस्थापक आप्पासाहेब बबन थोरात, अनिल नामदेव मापारी, दत्तात्रय बबन भुजबळ, रमेश भाऊसाहेब मासाळ,भरत गजाभाऊ पाचारणे,अरुण शांताराम आवारी, संतोष गंगाराम भनगडे या 13 जणांवर पारनेर पोलीस स्टेशनमध्ये गुन्हा दाखल करण्यात आला आहे.</p><p>14 फेब्रुवारी 2011 रोजी पारनेर सैनिक बँक पारनेर (ता. पारनेर) येथे पुरुषोत्तम नारायण शहाणे यांचा भाऊ राजेंद्र नारायण शहाणे यांनी सैनिक सहकारी बँकेकडून व्यवसायासाठी घेतलेल्या 6 लाखांच्या कर्जापोटी थकित रकमेसह 26 लाख 33 हजार रुपये होत होती. कर्जदारांनी ती रक्कम परतफेड केली असताना ती थकित असल्याचे दाखवून व सदर कर्जासाठी तारण असलेल्या मालमत्तेचा बँकेला कोणताही अधिकार नसतानाही बँकेने बेकायदेशीर व बोगस रीतीने प्रक्रिया राबवून त्या मालमत्तेचा लिलाव केला.</p><p>तसेच त्यात हजर नसलेल्या व्यक्तीची खोटी सही करून आम्हा भावंडांची आरोपींनी संगनमताने फसवणूक केली आहे, अशी फिर्याद दिली. यावरून पारनेर पोलीस स्टेशनमध्ये गुन्हा दाखल करण्यात आला असून पुढील तपास पोलीस निरीक्षक राजेश गवळी यांच्या मार्गदर्शनाखाली पोलीस उपनिरीक्षक बालाजी पद्मने करत आहेत.</p>.<div><blockquote>पारनेर तालुका सैनिक बँकेने कायदेशीररित्या कर्जदारांच्या कर्जाची वसुली व स्थावर मालमत्ता लिलाव केले आहेत. खोटे गुन्हे दाखल करून बँकेला व आम्हाला विनाकारण त्रास देण्याचा हा प्रकार आहे. </blockquote><span class="attribution">- शिवाजी व्यवहारे, अध्यक्ष पारनेर तालुका सैनिक बँक</span></div>
