<p><strong>पारनेर |प्रतिनिधी| Parner</strong></p><p>आ. निलेश लंके यांनी ग्रामपंचायत निवडणूक बिनविरोध करा गावासाठी 25 लाख रुपयांचा निधी घ्या अशी घोषणा केल्यानंतर त्यांच्या आवाहनास चांगला प्रतिसाद मिळू लागला आहे. </p>.<p>ज्येष्ठ समाजसेवक अण्णा हजारे यांची मायभूमी असलेल्या राळेगणसिद्धी ग्रामस्थांनी निवडणूक बिनविरोध करण्याचा निर्णय घेऊन आ. लंके यांना प्रतिसाद दिला. दरम्यान, तालुक्यातील सुमारे 20 ग्रामपंचायतीची निवडणूक बिनविरोध होण्याच्या प्रक्रियेत असून येत्या दोन दिवसांत आणखीही काही गावांच्या निवडणुका बिनविरोध होतील, असे चित्र असल्याचे अॅड. राहुल झावरे यांनी सांगितले.</p><p>तालुक्यातील पानोली व कारेगाव ग्रामपंचायतीची निवडणूक बिनविरोध करण्याचा निर्णय रविवारी आ. लंके यांच्या उपस्थितीत पारनेर येथे पार पडलेल्या बैठकीत घेण्यात आला.</p><p>कारेगाव व पानोली ग्रामस्थांनी आज बिनविरोध निवडणूक करण्याचा निर्णय घेतला.आ. लंके यांच्या या भूमिकेचे ज्येष्ठ समाजसेवक अण्णा हजारे यानी स्वागत केले असून निवडणूक बिनविरोध करण्यासाठी आ. लंके यांचा प्रचारक म्हणून काम करण्याची घोषणाही हजारे यांनी केली आहे. दरम्यान आदर्श गाव योजनेचे कार्याध्यक्ष पोपटराव पवार, पाटोदाचे सरपंच भास्करराव पेरे पाटील यांनीही आ. लंके यांच्या भूमिकेशी सहमती दर्शविली आहे.</p>
