<p><strong>नेवासा |शहर प्रतिनिधी|Newasa</strong></p><p>तालुक्यातील घोगरगावसह इतर दहा गावांना पाणीपुरवठा करणार्या कर्मचार्यांना पंधरा महिन्यांपासून </p>.<p>पगार नसल्याने मोठी उपासमार होत असल्याने थकीत पगार मिळावा, या मागणीसाठी पाणीपुरवठा कर्मचार्यांनी नेवासा पंचायत समितीसमोर काल बुधवारी सुरू केलेले उपोषण अधिकार्यांनी लेखी आश्वासन दिल्यानंतर स्थगित करून सोडण्यात आले.</p><p>उपोषणाचे नेतृत्व महाराष्ट्र राज्य ग्रामपंचायत कर्मचारी संघटनेचे सचिव दिलीपराव डिके, तालुका ग्रामपंचायत कर्मचारी संघटनेचे अध्यक्ष बाबासाहेब गोर्डे, पाणीपुरवठा कर्मचारी संघटनेचे गणेश डावखर यांनी केले.</p><p>पाणीपुरवठा करणार्या कर्मचार्यांनी उपोषणप्रसंगी म्हटले की आम्ही सर्व पाणीपुरवठा कर्मचारी घोगरगावसह इतर दहा गावांना पाणीपुरवठा करत असून गेल्या पंधरा महिन्यांपासून आम्हाला वेतन न मिळाल्याने आमच्या कुटुंबियांवर उपासमारीची वेळ आली असल्याने आम्हाला पंधरा महिन्याचे थकीत वेतन मिळावे म्हणून आम्ही उपोषणास बसलो आहोत. </p><p>घोगरगाव व इतर दहा गावांना पाणीपुरवठा करणारे कर्मचारी गणेश डावखर, सलीम बशीर शेख, हशमुद्दीन सरदार शेख, अशोक साठे, दत्तात्रय राऊत, अंकुश पठाडे, ग्रामपंचायत कर्मचारी संघटनेचे बाबासाहेब शेळके यांनी उपोषणामध्ये सहभाग घेतला होता.</p><p>यावेळी सभापती रावसाहेब कांगुणे, उपसभापती किशोर जोजार व सदस्यांशी झालेल्या चर्चेनुसार गटविकास अधिकारी शेखर शेलार यांनी केलेल्या सूचनेप्रमाणे सहायक गटविकास अधिकारी नवनाथ पाखरे व प्रादेशिक पाणीपुरवठा योजनेचे प्रशासक शिवराम सुपे यांनी पंधरा महिन्यांपैकी दोन महिन्यांचे वेतन येत्या सात दिवसांत देण्याची तरतूद करण्यात येईल तर उर्वरित वेतन एप्रिल 2021 अखेरपर्यंत देखभाल व दुरुस्ती अनुदान प्राप्त झाल्यानंतर देण्यात येईल, असे लेखी आश्वासन दिले.त्यानंतर उपोषण स्थगित करून ते मागे घेत असल्याचे सांगितले.</p>
