मुळाकाठ परिसरात वाळु लिलाव व वाळु डेपो विरोधात ग्रामस्थांचा रास्तारोको

करजगांव | वार्ताहर

शासनाने जाहीर केलेल्या नेवासा तालुक्यातील अंमळनेर येथिल मुळानदी पात्रातुन वाळु लिलाव व निंबारी येथिल वाळु डेपोच्या विरोधात मुळाकाठ परिसरातील गावांनी गाव बंद ठेवुन आज सकाळपासुन करजगाव-नेवासा रस्त्यावरील लक्ष्मीआई चौकात रास्ता रोको सुरू केला आहे. तसेच सकाळी पोलिसांचा मोठा फौजफाटा हजर झाला आहे.

काल शुक्रवारी सायंकाळी उशिरापर्यंत तहसिलदार संजय बिरादार ,सोनई पोलिस ठाण्याचे सहाय्यक पुलिस निरीक्षक माणिक चौधरी यांनी उपोषण ठिकाणी येत ग्रामस्थांशी चर्चा केली होती.मात्र चर्चे अंती कुठलाही निर्णय न झाल्यामुळे व तहसीलदार यांनी लेखी आश्वासन दिल्याने ग्रामस्थ आंदोलनावर ठाम राहिल्याने प्रशासन व ग्रामस्थ यांच्यातील वाद चिघळण्याची शक्यता निर्माण झाली आहे.

आज सकाळपासुन मुळाकाठ परिसरातील सर्व गावे बंद ठेवुन लक्ष्मीआई चौकात रास्तारोको आंदोलनामध्ये अंमळनेर, निंभारी, करजगाव, पानेगाव, शिरेगाव, खेडले-परमानंद, गोमळवाडी,वाटापुर,खुपटी, तसेच राहुरी तालुक्यातील वांजुळपोई, तिळापुर, मांजरी, तसेच मुळाकाठ परिसरातील गावातील ग्रामपंचायतीचे आजी-माजी पदाधिकारी तसेच ग्रामस्थ सहभागी झाले आहे.

वाळू लिलाव व डेपो लिलाव कायम स्वरुपी बंद करण्यासाठी संपूर्ण मुळा नदी काठ एक वटला असुन नदी पात्रातुन वाळुचा एकही खडा उचलु न देण्याचा निर्धार मुळाकाठच्या ग्रामस्थांनी केला आहे.यामुळे भविष्यात जिल्हा प्रशासन व मुळा काठ परिसरातील ग्रामस्थ यांच्यामध्ये मोठा संघर्ष होण्याची शक्यता निर्माण झाली आहे.